АҚШ Соғлиқни сақлаш вазирлиги ва ижтимоий хизматларнинг барча ходимлари пул компенсацияси эвазига ишдан бўшаш таклифини олди. Бу ҳақда манбаларга таяниб, CBS News хабар берди.
Вазирликнинг барча ходимлари 25 минг доллар миқдоридаги “ихтиёрий ишдан бўшаш учун рағбатлантирувчи нафақа” эвазига истеъфога чиқиш имконияти ҳақида хабарнома олган. Қарорни 14 мартгача қабул қилиш керак.
Трамп маъмуриятининг федерал ишчи кучини қисқартириш ва ҳукумат бюджетини оммавий ишдан бўшатишлар ҳамда молиявий қисқартиришлар орқали камайтириш бўйича саъй-ҳаракатларининг бир қисмидир. Бу жараён асосан миллиардер Илон Маск бошчилигидаги Оқ уйнинг ҳукумат самарадорлиги департаменти ёки DOGE орқали амалга оширилди, дейилади хабарда.
Таъкидланишича, январь ойидан бери АҚШда федерал агентликларнинг 62 мингдан ортиқ ходими ишсиз қолган. Бу 2020 йил июль ойидан бери ишдан бўшатишнинг энг юқори кўрсаткичидир.
АҚШ Соғлиқни сақлаш ва ижтимоий хизматлар вазирлигида 80 мингдан ортиқ ходим ишлайди, у озиқ-овқат ва дори-дармонларни назорат қилиш бошқармаси, АҚШ касалликларни назорат қилиш ва олдини олиш марказлари, Миллий соғлиқни сақлаш институтлари, Medicare ва Medicaid хизматлари марказлари каби бир қанча йирик соғлиқни сақлаш муассасалари фаолиятини назорат қилади.
Соғлиқни сақлаш вазирлигида синов муддатида бўлган минглаб ходимлар ўтган ойда ишдан бўшатилиши ҳақида хабардор қилинган, дея таъкидлайди CBS News.
Ходимларнинг оммавий ишдан бўшатилиши Соғлиқни сақлаш вазирлиги ишига қандай таъсир қилиши ҳозирча номаълум. Мамлакат яқинда парранда гриппи ва қизамиқ эпидемиясига дуч келди.
Аввалроқ Трамп вазирларни чақириб, кадрлар сиёсати масалаларида DOGE раҳбари Илон Маск эмас, федерал агентликлар раҳбарлари ҳал қилувчи рол ўйнашини айтган эди. Унинг сўзларига кўра, Маск фақат идоралар раҳбарларига кадрлар масаласида тавсиялар бериши мумкин, якуний қарорлар эса уларнинг ўзида қолади. Шу билан бирга, бу учрашувда Илон Маскнинг ўзи ҳам иштирок этган ва хатосини тан олган.
Изоҳ (0)