АҚШнинг Давлат бошқаруви самарадорлиги департаменти (DOGE) раҳбари, миллиардер Илон Маск америкаликлар орасида 20 миллион нафардан ортиқ “вампирлар” борлигини аниқлади.
У ўзининг Х ижтимоий тармоғидаги саҳифасида АҚШда нафақа оладиган америкаликларнинг ёши ҳақидаги жадвални эълон қилиб, жамоатчилик эътиборини “ғайриоддий рақамлар”га қаратди.
Ушбу ёзувларга изоҳ берар экан, Илон Маск ёзувчи Стефани Майернинг вампирлар ҳақидаги машҳур “Зулмат остонасидаги муҳаббат” романини тилга олиб, “америкаликлар орасида ҳақиқатан ҳам вампирлар бор” дея ҳазиллашди.
Ижтимоий таъминот маълумотлар базасига кўра, бу — ўлим устунида чизиқча кўрсатилган ҳар бир ёш гуруҳидаги одамлар сони. Эҳтимол, “Зулмат остонасидаги муҳаббат” романи ҳақиқатга тўғри келади ва ижтимоий таъминот оладиган кўплаб вампирлар мавжуддир, деб ёзди Маск ўзининг ижтимоий тармоғида маълумотлар жадвалининг скриншотини илова қилиб.
Жадвалдан кўриниб турибдики, АҚШда 20 миллион нафардан ортиқ одам узоқ умр кўрувчилар бўлиб, уларнинг ёши 100 дан ошган.
Масалан, АҚШ ҳудудида 150-159 ёшдагилар сони 1,3 миллиондан ортиқни, 220-229 ёшдагилар эса мингдан ортиқни ташкил этади. Шунингдек, жадвалда икки киши — бирининг ёши 240 дан 249 гача, иккинчисининг ёши эса 360 дан 369 гача экани қайд этилган.
Маълумотларга айнан қайси босқичда хатолик кириб қолгани ҳозирча номаълум. DOGE жадвалда келтирилган маълумотларни текшириб чиқишини маълум қилди.
Изоҳ (0)