TikTok хизматига эгалик қилувчи ByteDance компаниясининг асосчиси Чжан Имин Хитойнинг энг бой инсонлари рўйхатида биринчи ўринни эгаллади. Бу ҳақда Bloomberg миллиардерлар индекси маълум қилди.
41 ёшли тадбиркорнинг бойлиги 2024 йилда 13,6 миллиард долларга кўпайиб, 2025 йил март ойи охирига келиб 57,5 миллиард долларни ташкил этган.
Иккинчи ўринда 56,6 миллиард доллар сармояга эга бўлган Tencent Holdings технология компаниясининг ҳаммуассиси Пони Ма (Ма Хуатен номи билан ҳам танилган) турибди. Учинчи ўринда эса шишаланган сув ва алкоголсиз ичимликлар ишлаб чиқарувчи Nongfu Spring компанияси раҳбари Чжун Шаншан жойлашган бўлиб, унинг бойлиги 54,1 миллиард долларга баҳоланган.
Ўтган йили Bloomberg Billionaires Index талқинига кўра, Хитойнинг энг бой инсонлари рўйхатида Пони Ма етакчилик қилган эди. Ўша пайтда унинг бойлиги 43,7 миллиард долларга баҳоланганди. Рўйхатнинг иккинчи поғонасида 43,6 миллиард доллар сармоя билан Чжун Шаншан турган эди. Чжан Имин эса 43 миллиард доллар бойлиги билан учинчи ўринни эгаллаганди.
Илгарироқ Илон Маск 2027 йилга келиб дунёдаги биринчи триллионер бўлиши мумкинлиги тахмин қилинган эди.
Изоҳ (0)