АҚШ президенти Дональд Трампнинг айрим амалдорлари Илон Маск томонидан чиқарилган ходимлар эришган ютуқларни сарҳисоб қилиш талабига қарши чиқди. Бу ҳақда The New York Times хабар берди.
Маълум қилинишича, Федерал қидирув бюроси (ФҚБ) Пентагон, Давлат департаменти каби бир қатор давлат тузилмалар ўз фаолияти тўғрисида Маскнинг талабини бажармасликка қарор қилган.
Бир қатор амалдорларнинг ушбу фармойишни эътиборсиз қолдириш қарори Маскнинг ҳокимиятига нисбатан тобора кучайиб бораётган ташвишни акс эттиради, дейилади хабарда.
Маъмуриятнинг юқори лавозимли ходимларидан бирига кўра, бу амалдорлар унинг президентга шахсан таъсир ўтказа олишини билади. Улар Маскнинг Х ижтимоий тармоғидан ўзига тўсқинлик қилаётган шахсларни ажратиб кўрсатиш учун фойдаланишидан хавотирда.
Пентагон Маскнинг талабига жавобан идора ўз ходимлари фаолиятини текшириш учун масъул эканини ва буни ўз тартиб-қоидаларига мувофиқ амалга оширишини билдирган. Ташқи разведка бошқармаси раҳбари ҳам Маскнинг бу кўрсатмасини эътиборсиз қолдиришни буюрган.
Худди шундай ҳаракатларни ФҚБнинг янги раҳбари ва бошқа бир қатор амалдорлар ҳам амалга оширди. Уларнинг жавоби махфий ишларнинг беихтиёр ошкор бўлишига олиб келиши мумкин, гарчи Маскнинг хатида махфий маълумотларни ҳисоботга киритмаслик ҳақида кўрсатма берилган бўлса ҳам. Америка давлат хизматчилари федерацияси президенти Келли Маскнинг бу ҳаракатларини қонунга хилоф деб баҳолади.
АҚШда ҳукумат самарадорлиги департаменти (DOGE) раҳбари Илон Маск ҳисобланади. У ортиқча қоидаларни, керакcиз харажатларни камайтириш ва федерал агентликларни қайта ташкил этиш билан шуғулланади. Бир қатор идоралар аллақачон DOGE’нинг махфий маълумотларга киришини чеклаган.
Ўз навбатида, Оқ уйнинг судга тақдим этган маълумотига кўра, Илон Маск DOGE ходими эмас. Миллиардер президент маслаҳатчиси бўлиб ишлайди.
Оқ уйнинг бошқа катта маслаҳатчилари сингари, Маск ҳам ҳукумат қарорларини мустақил равишда қабул қилишда расмий ваколатларга эга эмас. У фақат президентга маслаҳат бериши ва унинг кўрсатмаларини етказиши мумкин”, дейилади маълумотномада.
АҚШнинг 14 та штатидан прокурор ва расмийлар Маск кенг ваколатларга эгалиги сабабли уни судга берганди.
Изоҳ (0)