Ирландиянинг иш ўринлари бўйича комиссияси (WRC) Х компаниясига (собиқ Twitter) компаниянинг собиқ ходими меҳнат қонунчилигига зид равишда ишдан бўшатилгани учун ярим миллион евродан кўпроқ товон пули тўлашни буюрди.
Бу комиссия ишлаган бутун давр учун рекорд даражадаги жарима, деб хабар беради Irish Independent.
Ишдан бўшатилган ходим Гари Руни Twitter’да 2013 йилдан бери ишлаган. 2022 йил октябрь ойида компания миллиардер Илон Маск томонидан сотиб олинганида Руни Дубльиндаги офисда харидлар бўлими бошлиғи эди.
Янги раҳбар Twitter’нинг барча ходимларига компаниянинг янги концепциясини тавсифловчи электрон хат юборди. Хабар охирида Илон Маск амал қилиниши керак бўлган ҳаволани қўшиб қўйди ва агар ходим “янги Twitter’нинг бир қисми бўлишни хоҳлаётганига” ишонч ҳосил қилса, 24 соат ичида “ҳа” тугмасини босиш зарурлигини таъкидлади.
Гари Руни “ҳа” тугмасини босмади ва уч кундан кейин компаниядан “ишдан бўшатилгани ҳақида” электрон почта хабарини олди. Ўша пайтдан бошлаб унинг Twitter тизимларига кириши ўчириб қўйилди. Руни Twitter штаб-квартираси билан боғланиб, у “ишдан бўшаш тўғрисида хат ёзмагани” ва “меҳнат шартномасини бекор қилиш бўйича ҳеч қандай келишув олмагани”ни айтди.
Кейин у меҳнат муносабатлари комиссиясига шикоят қилди. Рунининг сўзларига кўра, аввалига у ўзига юборган электрон почтани сохта, спам ёки зарарли дастурлардан иборат хабар деб ўйлаб, уни дарров очмаган. Ўқигандан сўнг ҳам тезда қарор қабул қила олмаган.
WRC Гари Руни адолатсиз равишда ишдан бўшатилган деб ҳисоблади. Комиссия қарорига кўра, Х даъвогарга 350 минг евро тўлаши керак, агар у ишдан бўшатилмаганида 2023 йилнинг январидан 2024 йилнинг майигача шунча пул ишлаши мумкин эди, шунингдек, кейинги ойларда даромадини йўқотганлик учун 200 минг евро товон тўлаши керак.
Х компанияси ҳали комиссия қарорига изоҳ бермади.
Изоҳ (0)