Америкалик тадбиркор Илон Маск ўзининг Х (собиқ Twitter) ижтимоий тармоғидаги саҳифасида давлат раҳбари когнитив тестдан ўтиши кераклигини ёзган. Бу ҳақда “Газета.ru” хабар берган.
Х ижтимоий тармоқ фойдаланувчиси Оқ уй Жо Байденнинг ақлий қобилиятини текширишни истамаслиги давлат раҳбарининг синовдан ўта олмаганини англатиши ҳақидаги фикрига жавобан Маск “ядро жомадони” бўлган шахс учун бу каби текширувлар ихтиёрий бўлмаслиги кераклигини айтди.
Шу ҳафта Оқ уй матбуот котиби Карин Жан-Пьер Байденнинг йиллик тиббий кўриги доирасида унинг ақлий қобилиятини баҳолашга ҳожат йўқлигини айтди. Матбуот котибига кўра, “президент билан саноқсиз соатларни ўтказган”лиги сабабли давлат раҳбарини ақлий синовдан ўтказишга сабаб йўқ. Далил сифатида Жан-Пьер Байден оммавий ахборот воситаларининг кутилмаган саволларига тезкорлик билан истеҳзоли жавоб бера олишини мисол қилиб келтирди.
Аввалроқ, АҚШ Демократик партияси вакиллари Байден маслаҳатчиларидан унинг руҳий саломатлиги ҳақидаги шубҳаларни йўқ қилиш учун оммавий чиқишлар ва матбуот билан мулоқотни кўпроқ ташкил этишга чақираётгани хабар қилинган. Россияга ташрифи чоғида журналист Такер Карлсон Байденни “ақлини йўқотган президент” деб атаган ҳамда Путинни мақтаган эди.
Изоҳ (0)