Жаҳон чемпионати саралаш учрашувлари доирасидаги Ўзбекистон ва Эрон баҳси 2:2 ҳисобида якунланди. Аббосбек Файзуллаев 52-дақиқада Эрон дарвозасига гол уриб, миллий жамоа сафида киритган голлари сонини 8 тага етказиб олди.
Бу орқали Файзуллаев Отабек Шукуров ва Остон Ўруновларнинг натижасини такрорлади. Мазкур натижага эришиш учун “ЦСКА” футболчисига 25 та ўйин етарли бўлди.
“Персеполис” сафида ҳаракат қиладиган Ўрунов эса 8 та гол уриш учун 32 учрашувда майдонга тушиши керак бўлган, Отабек Шукуров эса ушбу натижага 77 та ўйинда эришган.
Шунингдек, 15-дақиқада Эрон дарвозасини ишғол қилган Ҳожимат Эркинов миллий терма жамоа сафидаги 5-голини киритди. “Ал-Ваҳда” клуби футболчиси бу натижага эришиш учун “оқ бўрилар” сафида 33 та учрашувда майдонга тушиш етарли бўлди.
Эслатиб ўтамиз, Ўзбекистон терма жамоаси Жаҳон чемпионати саралаш учрашувларида 17 очко тўплаб, А гуруҳида 2-ўринни эгаллаб турибди. Мундиал йўлланмасини ҳал қилиш учун жамоага 1 очко етарли.
Изоҳ (0)