Президент билан суҳбат, “Монако”дан қизиқиш, ота-онасининг орзуси. Қандай қилиб 21 ёшли Аббосбек Файзуллаев РПЛ юлдузига айланди?

Аббосбек Файзуллаев — РПЛнинг охирги пайтлардаги энг ёрқин футболчиларидан бири. 21 ёшида аллақачон “ЦСКА” ва Ўзбекистон терма жамоасининг етакчиларидан бирига айланди. Деярли ҳар ой Аббоснинг Европага кетиши ҳақида хабарлар янграмоқда. Sport24 нашри ўзбекистонлик футболчи билан интервью уюштирди. Қуйида ушбу суҳбатни ўзбек тилида ўқиш мумкин.

Сўнгги 2 йил давомида атиги икки ҳафта дам олдим. Баъзида машғулотларга боргим ҳам келмай қоларди.

— Аббос, ишларинг қандай?

— Яхши. Мавсумнинг қийин бўлган биринчи қисми якунланди, ниҳоят таътилга чиқиш вақти келди. Ҳам жисмоний, ҳам психологик жиҳатдан дам олиш керак, чунки сўнгги 2 йил мобайнида икки ҳафтагина дам олгандим.

— Терма жамоа туфайлими?

— Ҳа. 2022 ва 2023 йилларда ёшлар терма жамоасида тўп сурдим. 23 йилнинг май ойида эса ёшлар ўртасидаги жаҳон чемпионатида иштирок этдим, бир ҳафтадан сўнг Миллатлар Лигаси доирасидаги ўйин бўлиб ўтди. 2024 йилнинг қишида миллий терма жамоа билан Осиё Кубогига бордим, баҳорда яна ёшлар термасига қайтдим. Улар билан турнирда 2-ўринни эгаллаб, Париж Олимпиадасига йўлланмани қўлга киритдик. Хуллас, тақвим ақл бовар қилмас даражада тиғиз. Шундай пайтлар бўлардики, уйғонганимда бутун танам оғрирди ва ҳеч қандай машғулотга боргим келмасди. Ўзимни мажбур қилишимга тўғри келарди.

— Бу босқичларни қандай қилиб жароҳатларсиз ўтказаётганингни айтиб бера оласанми?

— Аввало, Аллоҳдан мени жароҳатлардан асрашини сўрайман. Албатта, тикланиш билан жиддий шуғулланаман — массаж, совуқ сув, криосауна. Ҳар доим базадан энг охирги бўлиб кетаман. Уйимда ҳам турли фойдали нарсалар бор: лимфодренаж шимлари, массаж пистолети ва Ҳоландники сингари кўк нурни филтрлайдиган кўзойнак.

— Улар қандай ёрдам беради?

— Уларни ухлашдан бир неча соат олдин тақиш керак. Тақиш биланоқ танада мелатонин ишлаб чиқарила бошлайди, бу эса уйқу яхшиланишига олиб келади — натижада организм яхшироқ тикланади. Бундан ташқари, бу кўзойнак кўзларни дам олишига ёрдам беради. Аммо битта шарт бор: уларни таққандан кейин дастлабки 45 дақиқа давомида ҳеч қандай гаджетга қараш мумкин эмас. Бу жуда муҳим.

— Бу кўзойнак ҳақида қаердан хабар топдинг?

— Уларни биринчи марта Виктор Давилада кўрганман. Синаб кўрдим ва таъсири менга ёқди. Уларни қандай сотиб олиш мумкинлигини сўраганимда, у Россияга бундай нарсалар етказиб берилмаслигини айтди. Охир-оқибат, у менга бу кўзойнакларни Жанубий Америкадан, терма жамоа сафига борганида, олиб келди.

— Қизиқ.

— Ундан ташқари менда Whoop бор — уйқу яхшилигини аниқлайдиган ва тананинг неча фоизга тикланишини ҳисоблайдиган браслет бор. Бу ҳам ажойиб нарса.

“Зенит” ёки “Жирона”га ўтиш варианти бўлса, иккинчисини танлайман. Россия ичида ниманидир ўзгартириш нима учун керак?

— Бир неча ҳафта олдин оммавий ахборот воситаларида “Монако” сени ўз сафига қўшиб олишни жуда хоҳлаётгани ҳақида хабарлар пайдо бўлди. У ерда ўзингга уй топиб қўйдингми?

— Ҳа-ҳа, йўқ. Бу янгилик пайдо бўлиши биланоқ Мусаев ва Дивеев дарҳол мени мазах қила бошлашди, ота-онам эса барча қариндошлар уларни табриклашни бошлаганини айтишди. Лекин мен ҳаммани тинчлантириш учун шошилдим — барча янгиликларни ўзим ҳам интернетдан эшитдим. “Монако”нинг менга қизиқаётгани ҳақида ҳеч қандай маълумотга эга эмасман.

— Умуман олганда, сўнгги пайтларда сени тез-тез Европага жўнатишмоқда: “Бавария”, “Вильярреал”, “Реал Сосьедад”, “Жирона” ва “Парма” ҳақида миш-мишлар тарқалди. Шундай шов-шув сенга босим ўтказмайдими?

— Бунга хотиржамлик билан қарайман. Албатта, бундай клубларнинг қизиқиши ёқимли — демак, мен ҳамма нарсани тўғри қилаётган эканман. Лекин бу ҳақда кўп ўйласангиз, ўйин сифати аниқ пасаяди. Шунинг учун турли трансфер миш-мишларига эътибор бермасликка ҳаракат қиламан. Ўз агентларимдан ҳам мавсум давом этаётганда, менга бошқа жамоаларнинг қизиқишлари ҳақида ҳеч нарса айтмасликни сўрадим. Натижада мен ҳеч нарса сўрамайман ва менга ҳеч нарса айтишмайди. Бу идеал вазият. Ҳозир мен “ЦСКА” футболчисиман, мени ҳамма нарса қониқтиради. Кейинчалик нима бўлишини эса ўшанда кўрамиз.

— Ўзинг ҳам Европага бормоқчимисан?

— Албатта. Бу менинг мақсадим. Лекин ҳамма нарсанинг ўз вақти бор. Ҳозирча “ЦСКА”га бирорта Европа жамоасидан расмий таклиф келиб тушмаган. Борлари ҳам шунчаки оғзаки сўров даражасида.

— Қаерда ўйнамоқчисан?

— Испанияда. Худо хоҳласа — “Барселона”да. Лекин мен топ-клубдан бошламайман — балки ўртамиёна жамоага ҳам боришга рози бўларман.

— Сенингча ҳозир трансфер нархинг қанча?

— “Трансфермаркет”да менинг нархим 8 миллион евро эканини кўрдим.

— Нима деб ўйлайсан, “ЦСКА” сени қанчага сотиши мумкин?

— Билмайман. Мен бу саволга жавоб беришим керак деб ҳисобламайман. “ЦСКА” менга ишонди, имконият берди. Мен бу клубни яхши кўраман ва ҳурмат қиламан, агар таклиф “ЦСКА”га маъқул бўлса, кетаман.

— Сен РПЛдаги бошқа клубга ўтишинг мумкинми?

— Менимча, йўқ. “ЦСКА”да менга ҳаммаси қулай. Россия ичида ниманидир ўзгартиришнинг нима кераги бор?

— Агар “Зенит” сенга кўп пул берса-чи?

— Хўш?

— Уни танлайсанми ёки ўртача маошли “Жирона”ни?

— “Жирона”ни.

— Футбол томондан Европада ўйнашга тайёрмисан?

— Ёзда тайёр бўлмаганим аниқ. Ҳозир эса билмайман. Жисмоний жиҳатдан яна қўшишим керак, бунинг устида ишлаяпман — ёздан бошлаб қўшимча равишда жисмоний тайёргарлик бўйича мураббий билан шуғулланаман. У ҳар ой менга шахсий режани юбориб туради. Ўзимни бақувват қилиб юборишни хоҳлайман, чунки тезлик ва техника йўқолади. Лекин мен кучлироқ бўлишим керак. Шахсий машғулотлар менга ёрдам бераётганини ҳис қиламан, мен кучлироқ бўлдим. Буни майдонда ҳам кўриш мумкин — деярли барча яккакурашларга дадил бораман.

— Рақибларингдан қайси бири билан жиддийроқ тўқнашувда иштирок этдинг?

— “Рубин”даги Кабутов билан. У билан ишимиз яхши кетяпти — доим бир-биримизга қараб учамиз.

Онам доимо ўз уйи бўлишини орзу қиларди. Имконият туғилиши биланоқ сотиб олдим.

— Борди-ю, “Монако”га кўчиб ўтгудек бўлсанг, яқинларингни олиб кетасанми?

— Албатта.

— Нега Москвага олиб келмадинг?

— Улар бу ерда зерикишади. Баъзан бир-икки ҳафтага келишади-ю, кейин Сирдарёни соғиниб қолади. У ерда ҳамма қариндошлар, дўстлар бор.

— Сен онанг уй бекаси, даданг эса дорихонада ишлашини айтгандинг. Ҳануз шу ишдами улар?

— Ҳа. Лекин мен буни қандайдир катта иш ҳақи деб айтмаган бўлардим, — фақат ўзим учун. Уйимиз ёнида дорихона бор. Отам қўнғироқни эшитcа, чиқади ва сотади. Қисқаси — худди хобби каби. Мен уларга онам билан Тошкентга кўчиб ўтишни таклиф қилдим, у ерда 13 ёшли укам ўқийди. Лекин дадам хоҳламайди.

— Ота-онангга олиб берган энг катта совғанг?

— Тошкентдаги уй. Онам доим уни орзу қиларди. Унинг орзусини амалга ошириш имконияти туғилиши биланоқ шундай қилдим. Менинг укам худди шу уйда, бошқа акам билан бирга яшайди.

— Ижтимоий тармоқларда ярим миллион обуначинг бор. Сен ҳозир Ўзбекистондаги президентдан кейинги энг машҳур одаммисан?

— Ҳа-ҳа, менимча, сиз муболаға қиляпсиз. Бизда мендан анчагина машҳур бўлган қўшиқчи ва актёрлар бор. Айтганча, мен қўшиқчи Гафур ва рэпер Конста билан доим гаплашиб тураман. Конста билан бир жойданмиз, у ҳам асли сирдарёлик. Ҳамиша унинг концертига боргим келади, лекин вақт тўғри келмаяпти.

— Умуман, концертларга борганмисан?

— Йўқ.

— Қандай қилиб?

— Шунақа, футболчиларнинг жадвали тиғиз. Мен баҳорда Бастанинг концертига боришим деярли аниқ эди, лекин “Аҳмат” билан ўйинда сариқ карточка олдим.

— Буларни бир-бирига қандай алоқаси бор?

— Кейинги ўйинни — “Спартак”ка қарши баҳсни ўтказиб юборганим учун мени терма жамоага чақиришди. Шунинг учун мен бу карточкани атайлаб олганимни айтган одамларга айтмоқчиман: дўстларим, менинг чипталарим куйиб кетган (кулади).

— Кел, сенинг машҳурлигингга қайтайлик. Сени Ўзбекистонда тез-тез таниб қолишадими?

— Ҳа, кўп ёнимга келишади, суратга тушишади. 

— Москвада-чи?

— Бўлиб туради. Лекин Москва катта шаҳар бўлгани учун машҳурлик Ўзбекистонда бўлгани каби кучли сезилмайди. У ерда мени деярли ҳамма билади. Ресторанга хотиржам чиқиб бўлмайди — кимдир таниб қолади ва албатта, ёнимга келади. Бу ёқимли.

— Сен суратга тушишдан бош тортадиган одамга ўхшамайсан.

— Худди шундай, рад этмайман.

— Кўпинча, ёш футболчилар машҳурликка эришгач, “юлдузлик касали”га дучор бўлишади. Бунга йўлиқмаслик учун сенга нима ёрдам беради?

— Мен ота-онам ва амаким тарбиясини олганман — бу муҳими. Нимагадир эришганим, бошқаларга нисбатан ҳурматсизлик қилишим кераклигини билдирмайди.

Амаким агар Европада ўйнашни хоҳласанг, инглизчани ўрганишинг шарт деганди. Ҳозир испан тилини ҳам ўрганяпман.

— Инглиз тилини ўрганаётганингни айтгандинг. Қандай қилиб бу фикрга келгансан?

— Тўққиз ёшимда амаким мени Тошкентга олиб келганди. Орадан бир ярим йил ўтиб: “Агар Европада ўйнамоқчи бўлсанг, инглиз тилини ўрганишинг шарт”, деганди. Амаким Америкада ўқиб келгани боис инглизчани яхши биларди.

— Ҳозир ҳам репетиторга боряпсанми?

— Инглиз тилиданми? Йўқ. Инглиз тилини русчадан ҳам яхшироқ биламан. Инглиз тилидаги фильмларни бемалол томоша қила оламан, китоблар ўқий оламан. Репетиторга 3 ой борганман ва футбол сабабли бир ярим йил ташлаб қўйгандим. Худди шу ҳол яна такрорланган. Кейин ўзим мустақил шуғулланишни бошладим. Ҳозир испан тилидан репетиторга қатнаяпман.

— Қайси тилда ўйлайсан?

— Ўзбек тилида. Баъзи сўзлар хаёлимга инглиз тилида келади, лекин русчада эмас.

Ҳусанов “ПСЖ” ва “Тоттенҳэм”да ўйнаб кетиши мумкин. У мендан тезкорроқ — соатига 35 километр тезликда югуради”.

— Ўзбекистон президенти билан суратинг бор. Шавкат Мирзиёев билан суҳбатлашгансанми?

— Икки марта. U-20 Осиё Кубогида ғалаба қозонган пайтимизда у киши майдонга чиқиб келган ва кубокни топширган. Президент қўлидан кубокни қабул қилиш — икки карра фахр. Иккинчи марта эса ўтган йилнинг ёзида, Олимпиададан сўнг кўришдик. Президент мен, Ҳусанов ва Алиқулов билан учрашди.

— Нима деди?

— Футболни томоша қилишини, бизнинг муваффақиятимизни кузатиб боришини таъкидлади. Менга тўп тушиши билан дарҳол хавфли вазиятни кутишини, ота-онамга миннатдорликни етказиб қўйишимни ва тўхтаб қолмаслигимни айтди. Ота-онамга бу ҳақида айтганимда, улар жудаям хурсанд бўлишди.

— Ҳусановни эслаб ўтдинг. У “ПСЖ”га ўтиши мумкинми?

— Ўтган йили Беларусда ўйнаб юрган йигитга, ҳозирда “ПСЖ”, “Тоттенҳэм” ва яна бир қанча грандлар қизиқмоқда. Бу терма жамоадаги ўйинлар сенинг келажагингга кучли таъсир қилишининг белгиси — бу жуда яхши реклама.

— Ҳусанов ҳақиқатан кучлими?

— Ҳа. У Европа даражасига чиқишига ишонаман. Абдуқодир менинг энг яхши дўстларимдан, жуда кўп суҳбатлашамиз. У нималарга қодирлигини жуда яхши биламан. Исталган топ-клубда ўйнаб кета олади. “ПСЖ” ва “Тоттенҳэм” — унинг даражаси. Унда деярли барча сифатлар — техника, куч, биринчи пас юқори даражада. Тезлик борасида эса умуман таърифга тил ожиз — Ўзбекистон термасидаги энг тезкор футболчи. 

— Сендан ҳам тез югурадими?

— Юз фоиз. Кичик масофаларга яхши югураман, Ҳусанов эса катта қадамлари билан узоқроқ масофаларни бемалол ёпа олади. Биз буни ўлчаб кўрганмиз — у соатига 35 км тезликда югура олади.

“Кийим-кечак ва кроссовкалар — менинг заиф томонларим. Энг қиммати 1500 доллар туради”

— Дам олиш кунларинг қандай ўтади?

— Дўстларим билан кўпроқ вақт ўтказаман. Москвада уни севиб қолдим, чунки совуқ. Лекин кўпинча залга бораман, акамни ҳам у ерга боришга ундайман.

— Бирор марта тунги клубга борганмисан?

— Йўқ. Лекин тез-тез чойхонага бораман.

— Кийим-кечакларгачи, уларни ҳам сотиб олишга тез-тез бориб турасанми? Масалан, Ўрунов турли брендлар сумкаси билан тушган сурати анча шов-шув бўлди.

— Кийим-кечак ва кроссовкалар менинг заиф томонларим. Брендлардан ҳам нимадир сотиб олишим мумкин, лекин кўп ҳам эмас.

— Кокорин 15 минг долларга кроссовка сотиб олган. Сенда энг қиммат оёқ кийим қанча бўлган?

— Travis ва Louis Vuitton кроссовкалари бор. Энг қиммати — 1500 доллар. Уларни Туркия ва БААдан олиб келадиган одамларга буюртма бераман.

— Машинанг борми?

— Москвада йўқ. Ўзбекистонда эса Chevrolet Gentra машинам бор. Қиммат автомобилни сотиб олишни кераги йўқ. Шунчаки туриши учун сотиб оламанми? Ўзбекистонга камроқ боряпман охирги пайтлар.

— Москвада 4000-5000 доллар сарфлашингни айтгандинг. Нималарга сарфлайсан?

— Квартирага, таксига ва озиқ-овқатга сарфлайман. Ота-онамга ҳам етарлича пул жўнатиб тураман.

— Сен Москвада тирбандлик ҳайрон қолдирди, дегандинг. Ҳозир ҳам шу фикрдамисан?

— Москва жуда ёқди, яшаш учун ҳамма нарса бор. Тирбандлик — асосий муаммо, кўп вақтингни йўлда ўтказасан. Яқинда 40 дақиқада етиб бориш мумкин бўлган йўналиш бўйича бир ярим соат йўл босдим. Айтганча, Тошкентда ҳозир ҳам худди шундай — 10 баллик тирбандлик.

“Акинфеев — ҳамон Россиянинг энг кучли дарвозабони”

— “ЦСКА”га келганингда, сенинг қойилмақом ўйининг муҳокамалар марказида эди. Ҳозир Батраков билан шу ҳолат юз беряпти. Ҳасад қилмаяпсанми?

— Йўқ. Нега ҳасад қилишим керак? Биз турли хил одамлармиз. Батраков муваффақиятга эришса, бу ўзи учун жуда яхши. Мен эса фақат ўзимга эътиборимни қаратганман.

— Ўйин жиҳатидан ўхшаш томонлар йўқми?

— Балки, Батраков ҳам техник томондан кучли. “Локомотив”га қарши ўйинда унинг ажойиб зарбаси ва стандартларни яхши ижро этишига гувоҳ бўлганман.

— Техника ва дриблинг — сенинг энг муҳим жиҳатларинг. Бу борада РПЛда кимнинг ўйини сенга ёқади?

— Сперцян ва Обляковнинг ўйини ёқади. Шунингдек, Барко ҳам тўп билан яхши муомала қилади.

— Россияликлар орасида дриблерлар камлигини нима билан боғлаш мумкин?

— Шунчаки Россия футболида кучга кўпроқ эътибор берилади.

— Россияда қандай қилиб бунчалик тез порладинг?

— Яхши муҳитга тушиб қолдим, дарҳол жамоага қўшилиб кетдим. Кейин менга ўйин вақти ҳам кўпроқ берилди.

— Аввалига сенга етарлича баҳо беришмади, деб ўйламайсанми?

— Россияга келганимда, Ўзбекистонда ҳамма мени мослашолмаслигимни ва тезда ортга қайтишимни айтганди. Кўпчилик менга ишонмасди. Қўлимдан нима келишини исботлашим керак эди. Менимча, исботлаб бўлдим.

— Кўпчиликнинг таъкидлашича, сен бу мавсумда ва ўтган йилнинг охирида ёрқин ўйнай бошлаган экансан. Барқарорлик етишмаётганини ўзинг сезяпсанми?

— Эҳтимол. Ёшим туфайли ўзимни суперстабил ўйинчи деб ҳисобламайман. Фақат дунёда икки футболчи стабил ўйин намойиш этади — Месси ва Роналду. Баъзида футболчида пасайишлар бўлиши оддий ҳол. Борди-ю, таслим бўлсам, аллақачон захирада бўлардим.

— Барқарорлик учун нималарни қўшиш керак?

— Вақт керак, бу тажриба билан келади. Ўйлайманки, бир неча йилдан кейин мен яхши даражани барқарорроқ кўрсатаман. Бунинг учун қўлимдан келган ҳамма ишни қиламан.

— Сен баҳорда бир муддат Федотовнинг ишончини йўқотганингни айтгандинг. Нега бундай бўлди?

— Осиё чемпионатидан қайтганимдан кейин у билан гаплашдим. Чарчаганим сезилиб турарди. Федотов “Ўзингни бос, шунақа бўлади. Чарчаганингни кўриб турибмиз. Сенга аста-секин ўйин вақти берамиз. Сен кўп фойда келтиришинг мумкин”, деганди. 

— Ўзбекистон Олимпия терма жамоасини бошқарган Тимур Кападзе Акинфеев сени яхши қабул қилганини айтиб ўтганди. Игор билан боғлиқ қандай хотираларинг бор?

— Акинфеев менга: сен иштирок этган қандайдир сўровнома ўтказилса, албатта ғалаба қозонасан, чунки барча ўзбеклар сенга овоз беради, деб ҳазиллашади.

— “ЦСКА”га келишдан олдин ҳам Акинфеевни билармидинг?

— Албатта, айниқса, унинг Россияда ўтган Жаҳон Чемпионатидаги ўйини ёдимда қолиб кетган. Игор — ҳамон Россиядаги энг кучли дарвозабон.

— Машғулотларда унга гол урганмисан?

— Албатта. Деярли бир ярим йилдан буён бирга шуғулланамиз-ку.

— Кападзе машғулотлардаги мусиқаларга сен жавоб беришингни таъкидлаганди. Қандай мусиқаларни қўясан?

— Асосан Американча реп: Gunna, Central Cее, Bad Bunny. Ва Констанинг мусиқалари.

— Русча мусиқалардан-чи?

— Алблак 52 ни қўйишим мумкин.

— Олимпиада сенинг орзуйинг эди. Ҳозир нималарни орзу қиляпсан?

— Европанинг топ-клубида ўйнаш ва Чемпионлар Лигасида ғалаба қозонишни орзу қиламан. Терма жамоа билан эса Жаҳон Чемпионатида иштирок этишни. Барчасини амалга ошира оламан деб ўйлайман.

— Бир йилдан сўнг қаерда бўласан?

— Фақатгина худо билади. Ўйлайманки, майдонда бўламан.