Футбол бўйича Россия, Франция ҳамда Италия чемпионатида тур ўйинлари бўлиб ўтди. Бундан ташқари, “Рома” Европа Лигасида қатнашди.
Ушбу ўйинларда ўзбекистонлик футболчилар ўз клублари сафида майдонга тушди.
“ЦСКА” РПЛнинг 13-тур учрашувида “Факел” клуби билан баҳс олиб борди. Учрашувда ҳисоб очилмади. Аббосбек Файзуллаев баҳсни бошланғич таркибда бошлади ва тўлиқ ўйнади.
Sofascore нашри ярим ҳимоячининг ўйинини 7,2 баллга баҳолади. Москваликлар сафида Игор Дивеев энг юқори 7,6 баллга лойиқ кўрилган.
24 октябрь куни “Рома” Украинанинг “Динамо Киев” клуби билан Европа Лигаси тур учрашуви доирасида тўқнашди. Учрашувда Довбик томонидан киритилган ягона гол “Рома”га ғалаба келтирди.
Ушбу учрашувда Элдор Шомуродов 53-дақиқада Довбик ўрнига майдонга тушди. Sofascore нашри футболчининг ўйинини 6,8 баллга баҳолади. 7,9 балл олган “Рома” ҳимоячиси Зеки Челик ўйиннинг энг яхши футболчиси сифатида эътироф этилди.
Кеча, 27 октябрь куни “Рома” “Фиорентина” меҳмони бўлди. Мезбонларнинг 5:1 ҳисобидаги ғалабаси билан якунланган учрашувда Элдор Шомуродов захирада қолди.
Франция чемпионатининг 9-тур учрашувида “Ланс” “Лилль” клубини қабул қилди. Учрашувда мезбонлар тўпга кўпроқ эгалик қилди ва кўплаб вазиятларга эга бўлди. Аммо улардан фойдалана олмади. Баҳс тақдирини қўшимча дақиқаларда меҳмонлар томонидан урилган 2 гол ҳал қилди ва “Ланс” уйида очко йўқотди.
Учрашувда Ўзбекистон терма жамоаси ҳимоячиси Абдуқодир Ҳусанов тўлиқ ҳаракат қилди. Ҳимоячи кўп бора ҳужумларни ташкил этишда иштирок этди. Биринчи бўлимда портал томонидан 7 баллдан юқорига баҳоланган Абдуқодирнинг ўйини “Ланс” мағлубияти сабаб баҳс сўнгида пасайди — 6,9 балл.
Меҳмонлар дарвозабони Лукас Чевалиэр учрашувда 7,8 баллга лойиқ кўрилди.
Изоҳ (0)