Ўзбекистон миллий жамоаси март ойида Жаҳон чемпионати саралашидан ўрин олган 2 та баҳсда иштирок этади. Катанец соғлигидаги муаммо сабаб ўзаро келишувга асосан шартномани бекор қилгач, унинг ўрнига Темур Кападзе тайинланди. “Дарё” муҳим ўйинлар олдидан Ўзбекистон миллий жамоаси бош мураббийидан интервью олди. Қуйида ушбу интервьюни эътиборингизга ҳавола этамиз.
Анталияга сафар ҳақида
Ҳозирда деярли барча жамоамиз Анталияда йиғин ўтказмоқда. Мен ҳам клубларимиз ўтказаётган ўйинларни жойидан кўриш, футболчиларнинг ҳолати қандай эканлигига ўзим гувоҳ бўлиш учун Туркияга бориб келдим. Жамоаларимиз деярли ҳар куни ўйин ўтказишди ва ҳар бир ўйинга иложи борича боришга ҳаракат қилдим. Ҳозир қишки танаффус бўлганлиги учун кўп футболчилар оптимал формада эмас, шу сабабли жамоаларнинг йиғинлари орқали аниқ фикр билдира олмайман. Учрашувлар давомида клуб мураббийлари билан терма жамоага лойиқ бўлган футболчиларнинг ҳозирги ҳақида суҳбатлашдим. Сафар давомида баъзи футболчиларнинг ўйинини алоҳида кузатдим ва ўзим учун керакли хулосаларни олдим дея оламан. Энг асосийси — жамоалар янги мавсумга яхши тайёргарлик кўрмоқда, ҳамма футболчилар соғ-саломат.
Терма жамоадаги дастлабки йиғин ҳақида
Биласизлар, ушбу йиғин январь ойида бўлди. Кўплаб футболчиларимиз энди тайёргарлик кўраётган эди ва улар оптимал формада эмасди. Шунингдек, ушбу ўртоқлик учрашувига асосан ички чемпионатдаги терма жамоага номзод футболчилар таклиф қилинди. Бундан кўзланган асосий мақсад — терма жамоадаги ҳозирги муҳитдан хабардор бўлиш эди. Сабаби март ойида бўладиган йиғин пайти бизда жуда ҳам кам вақт бўлади ва бу пайтгача терма жамоада нималарни ўзгартирса бўлади, деган саволларга жавоб топиш эди. Терма жамоанинг ушбу йиғинида янги футболчилар кўп бўлди, уларнинг ҳолати қандай эканлиги бўйича аниқ тўхтамга келдим.
Илк бора чақирув олган футболчиларга кам вақт берганим сабаби уларга бўлган ишончсизлик эмас, балки таркибдаги барча футболчиларни кўздан кечириш эди. Максимал даражасида бутун таркибни ўйнатишга ҳаракат қилдим. Баъзи футболчилар ўз даражасида ўйнай олмаган бўлса-да, уларни айблай олмаймиз. Чунки бу — терма жамоа. Унинг либосини кийгач, барчада ҳаяжон бўлиши табиий.
Яна бир асосий сабабларида бири — қишки йиғин пайти, Суперлигада мавсум тугаган, кўпчилик энди таътилдан машғулотларга қайтмоқда ва албатта бу ўйинга жиддий таъсир ўтказади. Шунингдек, терма жамоа ҳамда Суперлига баҳслари умуман бошқа даража. Унга муносиб бўлиш учун эса кўпроқ вақт керак.
Легионерлар ҳақида
Ҳар бир легионеримиз билан алоқада бўлиб турибман. Уларнинг ҳозирги ҳолати қандай эканлиги ҳақида деярли ҳар куни маълумот олишга ҳаракат қиляпман. Барчасининг жисмоний ҳолати яхши даражада. Бироқ Эрон чемпионатидаги икки футболчимизнинг жароҳати бир оз хавотирга солиши мумкин.
Яқинда Жалолиддин Машарипов билан гаплашдим. Унинг ҳозирги ҳолати қандай эканлиги, қачон сафга қайтиши ва тиклана олиши учун қанча муддат кераклигини сўрадим. Билишимча, унинг ҳозирги формаси яхши, индивидуал машғулотлар олиб боряпти. Умид қиламанки, шифокорлар рухсат берса, кейинги учрашувда майдонга тушади.
Остон Ўрунов борасида ҳам шу фикрларни билдириш мумкин. Тўғри унинг ҳолати Машариповникидан жиддийроқ, лекин гаплашганимда олдингидан анча яхши эканлигини айтди. Билишимча, яқин кунларда у ҳам умумий машғулотларга қайтади. Биз учун қанча тез тикланса, шунча яхши, лекин таваккал қилиш керак деб ўйламайман. Шу сабаби шифокор билан маслаҳатлашиб, кейин навбатдаги қадамни босиш керак.
“Ақтобе”нинг таклифини рад этдим”
Менга кўплаб клублардан таклиф бўлгани рост. Номини айтадиган бўлсам, “Ақтобе” вакиллари мен билан боғланишди. Биласиз, мен Қозоғистоннинг ушбу клубида ўйнаганман. Шу сабабдан ҳам улар менга ишонч билдиришган эди. Лекин у пайтда мен Олимпия терма жамоаси билан эдим. Шу сабабли уларнинг таклифига рад жавобини бердим.
“Кўп нарсани ўзгартирмоқчи эмасман”
Ўзбекистон терма жамоаси билан йил охиригача, аниқроғи ноябрь ойигача шартнома имзоладим. Лекин шуни айтишим керакки, мен учун ҳеч қандай битим рол ўйнамаган. Чунки бу — терма жамоа. Аслида ҳаммаси жуда тез бўлиб кетди. Сречко Катанец жамоа ихтиёрига кела олмаслигини билгач, раҳбариятдан истеъфо сўрашга мажбур бўлди. Шу сабабли, келишув муддати қачонгача ёки қандай эканлигига катта эътибор бермадим.
Терма жамоада доим баланс бўлиш керак деб ҳисоблайман. Терма жамоа Катанец қўл остида бир оз ҳимоявий ўйин кўрсатган, мен эса айтгангиздек ҳужумкорроқ ўйинни маъқул кўраман. Лекин ҳар бир мураббийнинг ғалаба учун ўз режалари бўлади. Шу сабабли иккимизнинг қарашларимиз турлича бўлиши мумкин. Вақт кам эканлигини ҳисобга олсак, жамоада кўп нарсани ўзгартираман дея олмайман. Олдинги ўйинларни таҳлил қилиб чиқамиз, нимадур қўшиш лозим бўлса, қўшган ҳолда асосий мақсадимизга етиш учун ҳаракат қиламиз. Футболчиларимизнинг маҳорати ва потенциали анча юқори. Улар ўзларига юклатилган вазифаларни бажара олишига ишонаман. Учрашувга оз муддат қолганда йиғилишимизни ҳисобга олсак, барчасини мураббийлар штаби футболчилар билан маслаҳатлашган ҳолда маъқул вариантни қиламиз.
Катанецнинг ёрдамчилари ҳақида
Сречко Катанецнинг ёрдамчи мураббийларини таркибда олиб қолиш менинг қарорим эди. Сабаби улар уч ярим йилдан бери терма жамоа таркибида ишлаб келмоқда ва ички ҳолатни менга қараганда яхшироқ билишади. Федерация раҳбарлари бу борада фикр сўрашганда, Қатардаги йиғиндан сўнг қароримни билдиришимни айтдим. Кейинчалик улар билан суҳбатлашдим, саволлар бердим ва улар билан машғулот олиб бордим. Тушундимки, уларда барчаси профессионал даражада. Агар таркибга янги мураббийлар қўшиш керак бўлса, бунинг ҳеч қандай муаммоли жойи йўқ. Раҳбарият билан келишган ҳолда барчасини амалга оширамиз.
Терма жамоага номзод футболчилар ҳақида
Мен учун барча футболчи терма жамоа учун номзод футболчи ҳисобланади. Агар футболчининг потенциали юқори бўлса хоҳ хорижда ўйнасин, хоҳ Суперлигамизда ҳаракат қилсин мен учун доим МТЖ учун номзодлар қаторида бўлади. Ҳозирги вазиятдан келиб чиқиб, ушбу позицияга қайси футболчи номзод эканлигини таҳлил қилиб, қарор қабул қилишга мажбур бўламоқдамиз. Расмий учрашувларда 23 ёки 24 футболчи хизматидан фойдалана олишимиз мумкин. Шу боис, энг муносибларини чақиришга ҳаракат қиламиз.
“Янги футболчиларни оловга ташлаш — катта таваккал”
Катанец ўзи ишлаган уч ярим йил давомида Азизжон Ғаниев ёки Икромжон Алибоевни ҳам терма жамоа йиғинига таклиф қилган. Менимча, қайсидир жиҳатлари тўғри келмагандирки, уларни бошқа таркибга жалб қилмаган. Албатта бу унинг қарори ва бошқалар уни ҳурмат қилиши керак эди. Менга келадиган бўлсак, мен терма жамоага номзод футболчиларнинг ҳар бирининг ўйинларини кузатиб бормоқдаман. Айтиб ўтишим керакки, ҳозирги пайт бизнинг вақтимиз жуда кам. Расмий учрашувлардан 3 кун олдин йиғилиб, тезда ўйин ўтказишимизга тўғри келади. Янги футболчиларни олиб келиб, уларни синаб кўрмасдан оловга ташлаш эса катта таваккал ҳисобланади. Лекин олдин ўйнаган ёки яқин йиллар давомида чемпионат доирасида ўйнаган номзодлар кенгайтирилган таркибда бўлади. Имкон бўлиши билан уларни йиғинга таклиф қиламиз. Қирғиз Республикаси ва Эронга қарши баҳсларда янги футболчиларни таркибда кўришимиз мумкин. Лекин уларни янги деб ҳисоблаш ҳам хато, аслида. Сабаби, кўпчилик Қатардаги йиғинда МТЖдаги дебютини ўтказган бўлса, қолганлари аввалроқ миллий жамоа либосида ҳаракат қилган. Мураббийлар штаби билан ҳали маслаҳатлашиб кўрамиз ва якуний қарорни эълон қиламиз.
Аббосбек Файзуллаев қайси позицияда ўйнайди?
Аббос Файзуллаев ЦСКА ва Миллий терма жамоада турли хил позицияларда ўйнайди. Мен эса футболчининг кучли тарафидан максимал фойдаланишга ҳаракат қиламан. Аббос турли хил позицияларда ўйнай олиши — унинг ва терма жамоанинг ютуғи. Жамоа ўйини учун танланган тактика бўйича қарор қабул қиламиз. Сабаби ҳозир ЦСКА ҳам турли хил тактикаларни синаб кўрмоқда. Ҳозир бу ҳақида эмас, кўпроқ футболчиларнинг йиғинга яхши формада ҳамда соғ-саломат келишидан умид қилмоқдамиз. Агар ўйин учун асосий таркибни танлашда қийинчиликка учрашсак, албатта бу бизнинг ва МТЖнинг ютуғи ҳисобланади.
Тўлиқ видеони YouTubeдаги каналимизда кўришингиз мумкин.
Жамшидбек Маҳмудов суҳбатлашди
Изоҳ (0)