Польша президенти Карол Навроцкий украиналик қочқинларга ижтимоий имтиёзларни узайтиришни назарда тутган қонун лойиҳасига вето қўйди. Бу ҳақда Reuters агентлиги хабар берди.
Манбага кўра, қонун лойиҳаси қочқинларга ҳимоя ва ижтимоий имтиёзларни тақдим этишни кўзда тутган. Вояга етмаганлар ҳеч қандай шартларсиз нафақа ва бепул тиббий хизмат олиш ҳуқуқига эга эди. Қонун 2026 йилнинг мартигача амал қилиши керак эди. Агар янги ҳужжат кучга кирмаса, имтиёзлар 30 сентябрь куни бекор қилинади.
Президент Навроцкий Польша украиналик қочқинлар учун очиқ бўлиб қолишини таъкидлади. Бироқ, унинг сўзларига кўра, 2022 йилдан буён вазият ўзгарган, шунинг учун қонунчиликни мослаштириш зарур. У болалар учун нафақалар ва бепул тиббий ёрдамни фақат ишлаётган украиналикларга қолдиришни таклиф қилган.
Бош вазир ўринбосари Кшиштоф Гавковский президент ветосидан сўнг Украина учун Starlink тизимига тўлов ҳам хавф остида эканини билдирди. Польша украин армияси учун сунъий йўлдош алоқасини молиялаштираётган энг йирик донор мамлакатлардан бири саналади. Ушбу маблағлар айнан президент вето қўйган қонун орқали ҳуқуқий жиҳатдан тартибга солинади. Шундай қилиб, Украина Қуролли Кучлари октябрь ойида Starlink билан боғлиқ муаммоларга дуч келиши мумкин.
Сўнгги ойларда Европа мамлакатлари украиналик қочқинларга кўрсатилаётган ёрдамни камайтира бошлади. Германияда 1 апрелдан бошлаб келган янги қочқинлар пастроқ ижтимоий тўловларни олмоқда. Словакия 2025 йил февралидан бошлаб бошпаналарда қолиш муддатини ва молиявий ёрдамни қисқартирди. Чехия эса қочқинлар учун бепул гуманитар турар жой муддатини беш ойдан уч ойга туширди.
Изоҳ (0)