Москванинг “ЦСКА” клуби ва Ўзбекистон миллий жамоаси футболчиси Аббосбек Файзуллаев “Монако” клубига ўтиши мумкинлиги ҳақидаги миш-мишларга муносабат билдирди. Аббосбекнинг сўзларига кўра, француз клубидан ҳеч ким у билан боғланмаган.
— Бир неча ҳафта олдин ОАВда “Монако” сизни ўз сафига қўшиб олишга жиддий киришгани ҳақида хабар тарқалди. Ўзингизга у ердан уй топдингизми?
— Йўқ. Бу хабар пайдо бўлиши билан Мусаев ва Дивеев мен билан ҳазил қилишни бошлади, ота-онам эса барча қариндошларимиз табриклашганини айтди. Мен ҳаммани тинчлантирдим. Ўзим ҳам бу янгиликни интернетдан билдим. “Монако”нинг қизиқиши ҳақида менда ҳеч қандай маълумот йўқ, деди Файзуллаев Sport24 нашрига.
Маълумот учун, Файзуллаев 2023 йилнинг август ойидан бери “ЦСКА” сафида тўп суради. Жорий мавсумда у клуб учун барча мусобақаларда 23 та ўйинда майдонга тушиб, 3 та гол урди ва 6 та ассист амалга оширди. Ўзбекистон миллий жамоаси футболчисининг россиялик клуб билан амалдаги шартномаси 2026 йил ёзигача тузилган.
Transfermarkt интернет порталида келтирилган маълумотга кўра, футболчининг бозор қиймати 8 миллион еврони ташкил қилади. У бу борада Ўзбекистонда иккинчи ўринда туради.
Маълумот учун, Аббосбек Файзуллаев 2024 йилда Ўзбекистоннинг энг яхши футболчиси деб топилди.
Изоҳ (0)