Ўзбекистон терма жамоаси аъзолари ушбу ҳафтада ўз клублари сафида ҳаракатни давом эттирди.
Франция чемпионатининг 14-турида “Ланс” ўз майдонида сўнгги ўриндаги “Монпелье”га қарши майдонга тушди ва ғалаба қозонди.
Мезбонлар сафида Ўзбекистон миллий жамоаси ҳимоячиси Абдуқодир Ҳусанов тўлиқ ҳаракат қилди. Sofascore нашри ҳимоячининг ўйинини 7,8 баллга лойиқ кўрди. Айнан у ушбу баҳснинг энг яхши ўйинчиси совринини қабул қилиб олди.
Аббосбек Файзуллаев ва “ЦСКА” клуби “Факел” клубига қарши майдонга тушди. Учрашувни 13-дақиқада Тамерлан Мусаев томонидан киритилган гол ҳал қилди — 0:1.
Ўзбекистонлик футбол 87 дақиқа ҳаракат қилиб, ўз ўрнини Рифат Зҳемалетдиновга бўшатиб берди. Sofascore нашри Аббосбекнинг ҳаракатларини 6,9 баллга баҳолади. Гол муаллифи Мусаев 8 баллга лойиқ кўрилди. Ушбу ғалабадан сўнг, “ЦСКА” клуби 31 очко билан 6-ўринда бормоқда.
“Рубин” Махачкаланинг “Динамо”си устидан меҳмонда ғалабага эришди. Ўзбекистонлик Рустам Ашурматов ва Умарали Раҳмоналиев захирада қолдирилди.
Эронда “ўзбекча дерби” кузатилди. Ўткир Юсупов ҳаракат қилаётган “Фулад” Жалолиддин Машарипов тўп сурадиган “Истиқлол” клубини қабул қилди. Учрашувда меҳмонлар 0:2 ҳисобида ғалаба қозонди. Жалолиддин жамоасининг иккинчи голига ҳаммуаллифлик қилди.
“Рома” клуби Италия А Серияси 15-тури доирасида “Лечче” клубини қабул қилди ва йирик ҳисобда ғалаба қозонди. Ўзбекистон терма жамоаси сардори Элдор Шомуродов захирада қолди.
“Ал-Ваҳда” шарафини ҳимоя қилаётган Ҳожимат Эркинов БАА Про лигасининг 9-тури доирасида “Ал-Уроба”га қарши баҳсда голли узатмани амалга оширди. Учрашувда “Ал-Ваҳда” 3:0 ҳисобида ғалаба қозонди. Flashscore нашри футболчининг ҳаракатларини 8,2 баллга баҳолаган.
Изоҳ (0)