FIFA сайти Жаҳон чемпионати саралаши Осиё минтақасида ажойиб ўйин кўрсатаётган 6 ёш футболчи фаолиятига тўхталди. Улар орасида Ўзбекистон миллий жамоаси футболчиси Аббосбек Файзуллаев ҳам бор. “Дарё” ушбу мақолани тўлиқлигича тақдим этади.
Мустаҳкам ҳимоячилар, марказда ўйинни ташкил қилиб берувчилар, айёр қанот футболчилари ва аниқ зарба берувчи ҳужумчилар: FIFA Осиё саралашининг сўнгги босқичида кўзни қамаштираётган олтита юлдузни кўздан кечирди.
- Осиёда Жаҳон Чемпионати саралаш босқичи учинчи раунди тугашига атиги тўрт ўйин қолди.
- Ёш истеъдодлар 6-турда яна бир бор порлади.
- Абдулла, Амин, Файзуллаев, Фердинан, Ким ва Мажид алоҳида ажралиб турди.
Осиё ёшлар даражасида ажойиб натижаларга эга: ўтган бешта FIFA U-20 Жаҳон Чемпионатининг учтасида Осиё Футбол Конфедерацияси (AFC)га аъзо давлатлар ярим финалга етиб борган, шунингдек, U-17 ва U-23 даражаларида ҳам ўзини кўрсатган.
Аммо муаммо кўпинча ёш истеъдодларни ҳақиқий юлдузларга айлантиришда бўлган. FIFA Жаҳон Чемпионати—26 саралаш босқичида давом этаётган ўйинлар қитъада истеъдодлар кам эканини инкор этади.
FIFA яқинда ўтган ОФК саралаш ўйинларида ўз маҳоратини намойиш этган олтита юлдузни ёритиб беради.
Ҳариб Абдулла (БАА)
Фабио Лиманинг тўртта голи БААнинг Қатар устидан қозонган йирик ғалабасида асосий эътиборни тортган бўлиши мумкин, аммо амирлик ёш истеъдод Ҳариб Абдулланинг бу муваффақиятдаги ҳиссасини эътибордан четда қолдириб бўлмайди.
Динамик ҳужумчи ўзининг тезлиги ва бевосита ҳужумлари билан доимий хавф туғдириб, бир нечта голларни ташкил қилишда муҳим рол ўйнади. У иккинчи голга олиб келган пенальтини ишлаб олди ва учинчи ажойиб голга замин яратган жарима зарбасига ҳам сабабчи бўлди.
Юсуф Амин (Ироқ)
Осиё қитъасида Ироқдан кўра кўпроқ ёш истеъдодларга эга миллатни топиш қийин. Ҳусайн Али, Али Жасим, Зидан Иқбол ва Али Ал-Ҳамади каби ўйинчилар ҳали ўсмирлик ёшида бўлса-да, биринчи жамоада мунтазам ўйнашмоқда.
Бу сафар эса яна бир ёш юлдуз ўзини кўрсатиб, жамоасига мундиалнинг финал босқичига иккинчи бор йўл олиши учун муҳим уч очко тақдим этди. Дортмунднинг "Боруссия" клубида тарбияланган 21 ёшли Юсуф Амин Мускатдаги ўйинда Аймен Ҳусайннинг узатмасини аниқлик ва хотиржамлик билан голга айлантириб, жамоанинг ягона голини урди.
Аббосбек Файзуллаев (Ўзбекистон)
Яқиндагина ОФКънинг Йилнинг энг яхши ёш футболчиси мукофотига сазовор бўлган Аббосбек Файзуллаев ўз обрўсини янада оширишда давом этмоқда. Корея Халқ Демократик Республикасини мағлуб этишда кўрсатган маҳоратли ўйини бунга яна бир мисол бўлди.
Бўйи кичик бўлса-да, юқори техник маҳорати ва ҳимоячиларни доғда қолдиришга бўлган қатъияти билан ажралиб турадиган Москва клуби вакили Вентян шаҳрида бўлиб ўтган ўйинда ягона голни киритди. У жарима майдончасининг ташқарисидан кучли зарба йўллаб “Оқ бўрила”ни илк бор Жаҳон чемпионатининг финал босқичига чиқиш йўлида имкониятларини яхшилади.
Марселино Фердинан (Индонезия)
Узоқ вақтдан бери “Garuda”нинг навбатдаги буюк истеъдоди сифатида эътироф этилаётган Марселино Фердинан, сўнгги саккиз финалдан олтитасида қатнашган Саудиядек кучли жамоани мағлуб қилишда марказий рол ўйнади. Маҳаллийлаштирилган юлдузлар сони ортиб бораётган таркибда, 20 ёшли Сурабаялик футболчи маҳаллий футбол ҳам етук истеъдодларни етиштираётганини кўрсатди.
Жакартадаги Гелора Бунг Карно Стадионида, футболнинг улкан саҳналаридан бирида, Марселино 2:0 ҳисобидаги ғалабанинг иккала голини ҳам киритди. Биринчи голни пенальти нуқтаси яқинидан мураккаб зарба билан амалга оширди, иккинчисини эса чаққон реакцияси билан тўпни дарвозага йўллаб, ўз халқининг саралаш босқичидаги умидларини қайта жонлантирди.
Ким Ю-сонг (Корея Халқ Демократик Республикаси)
Ўйиннинг кўп қисмини ҳимояда ўтказадиган жамоа сафида Ким Ю-сонг саралаш босқичи давомида ҳақиқий ажралиб турувчи футболчига айланди. 21 ёшли пхенянглик ҳимоячи ўзининг тезлиги, аниқ узатмалари ва ўйинни пухта англаш қобилияти билан вақтида тўпни эгаллаб олиш ва рақибни тўхтатишда моҳирлик кўрсатмоқда.
У Корея ХДРнинг тўрт кишилик мудофаасида фахрий футболчи Чанг Кук-чол учун идеал шерик бўлиб хизмат қилмоқда. Лаосдаги нейтрал ҳудудда ўтган ўйинда ҳам у ажойиб ўйин кўрсатиб, учта муҳим зарбани тўсди, икки бор тўпни ҳужумчидан олиб қўйди ва бир неча марта зарурий блоклар амалга оширди.
Юсуф Мажид (Кувайт)
Кувайт футболининг катта умиди бўлган Юсуф Мажид биринчи бўлимда рақиб томонидан назорат остида турди. Шундай бўлса-да, тўп йўқ пайтдаги узлуксиз ҳаракати билан ажралиб турди. Бу унинг ўйинининг кам баҳоланадиган қисми ҳисобланади. Унинг тинимсиз тўпсиз ҳаракати Иорданиядек хавфли жамоа учун майдонда жой топишни қийинлаштирди. Иккинчи бўлим ўрталарида эса Юсуф ҳал қилувчи ассистни амалга ошириб, ҳисобни тенглаштирувчи голга сабаб бўлди ва Кувайтнинг саралашдаги умидларини сақлаб қолди.
Маълумот учун Осиё қитъасидаги мундиал саралашининг 6-тур учрашувлари 19 ноябрь куни ўтказилди. Қолган 4 тур 2025 йилда бўлиб ўтади. 20 март куни бўладиган 7-тур баҳсида Ўзбекистон миллий жамоаси Тошкентда Қирғизистонни қабул қилади.
Изоҳ (0)