Ўзбекистон Европа иттифоқи томонидан молиялаштириладиган телекоммуникация соҳасидаги икки стратегик лойиҳа бўйича келишувларга эришди. Бу ҳақда Европа иттифоқининг мамлакатдаги ваколатхонаси матбуот хизмати хабар берди.
18 март куни Тошкентда бўлиб ўтган имзолаш маросимида халқаро ҳамкорлик бўйича Европа комиссари Йозеф Сикела иштирок этди.
Биринчиси “Марказий Осиё учун алоқа” (C4CА) лойиҳаси бўлиб, минтақада рақамли инфратузилма ва интеграцияни яхшилашга қаратилган. У Марказий Осиё мамлакатларини яхшироқ боғлашга, ҳамкорлик ва иқтисодий алмашинувни ривожлантиришга хизмат қилади. Рақамли интеграцияни ошириш орқали лойиҳа иқтисодий ўсишни қўллаб-қувватлайди, онлайн хизматлардан фойдаланиш имкониятларини яхшилайди ҳамда минтақадаги рақамли тафовутни бартараф этишга ёрдам беради.
Иккинчи “Марказий Осиёнинг олис ҳудудлари аҳолиси учун сунъий йўлдош алоқаси” лойиҳаси —чекка ва олис ҳудудларни юқори тезликдаги интернет билан таъминлашга қаратилган. Лойиҳа қишлоқ ва олис ҳудудлар аҳолиси учун таълим, соғлиқни сақлаш ва иқтисодий ривожланиш соҳаларида рақамли имкониятларни кенгайтиришга хизмат қилади.
“Европа иттифоқи ва Ўзбекистон бутун Марказий Осиё бўйлаб интернет алоқасини яхшилаш йўлида биргаликда ишламоқда. Европа технологиялари ва Ўзбекистонинг тажрибаси кўпроқ одамларга тезкор ва хавфсиз интернетдан фойдаланиш имкониятини яратади, бизнесларни қўллаб-қувватлаб, янги иш ўринларини яратади ҳамда маҳаллий жамоалар учун яшаш шароитларини яхшилайди. Рақамли алоқага сармоя киритиш орқали биз бўшлиқларни тўлдирмоқдамиз, имкониятлар яратмоқдамиз ва Марказий Осиё минтақасининг рақамли иқтисодиётдан тўлиқ фойда олишини таъминламоқдамиз”, деган Йозеф Сикела.
Якунда томонлар учрашув учун бир-бирига миннатдорчилик билдириб, ўзаро манфаатли ҳамкорлик ва яқин келажакда қўшма лойиҳаларни муваффақиятли амалга оширилишига умид билдирди.
Ўзбекистонга Йозеф Сикела ташрифи
Европа иттифоқининг халқаро ҳамкорлик бўйича комиссари Йозеф Сикела Европа иттифоқи ва Марказий Осиё ҳамкорлигини ривожлантириш, янги иш ўринлари яратиш ва барқарор иқтисодий ўсишни кучайтиришга йўналтирилган Global Gateway (“Глобал дарвоза”) инвестицион стратегиясини кенгайтириш мақсадсадида 12–18 март кунлари Марказий Осиёга ташриф буюриши хабар берилган эди.
Ўзбекистонга у 17 март куни келди. ТИВ раҳбари Бахтиёр Саидов билан учрашди. Унда Ўзбекистон ва Европа Иттифоқи муносабатларини янада мустаҳкамлаш йўлларини ўрганиб чиқиб, иқтисодий ҳамкорлик, сармоявий ва минтақавий барқарорликка катта эътибор қаратилди.
18 март куни Сикела Шавкат Мирзиёев қабулида бўлди. Ўзбекистон билан Европа иттифоқи ўртасидаги кўп қиррали муносабатларни янада ривожлантиришнинг долзарб масалалари муҳокама қилинди. Учрашувда жорий йил апрель ойи бошида Самарқанд шаҳрида “Марказий Осиё — ЕИ” биринчи саммити ва Иқлим форумини ташкил этиш ва ўтказиш жиҳатлари ҳам кўриб чиқилди.
Изоҳ (0)