Ўзбекистонда сўнгги икки ойда ўтказилган текширувларга кўра, умра лицензиясига эга бўлмасдан ушбу хизматни кўрсатаётган 31 та сайёҳлик фирмаси масъулларига нисбатан жиноят иши қўзғатилди.
Дин ишлари бўйича қўмита матбуот хизматининг билдиришича, улар Жиноят кодексининг 168-моддаси (фирибгарлик) билан айбланмоқда.
Сўнгги икки ойда “Лицензиялаш, рухсат бериш ва хабардор қилиш тартиб-таомиллари тўғрисида”ги қонун талаблари асосида умра фаолиятини лицензиясиз амалга оширган 24 та турфирмада текширув ўтказилган бўлиб, уларнинг 19 таси 75 миллион сўмдан жаримага тортилган (5 таси “Реклама тўғрисида”ги қонунчиликка асосан Рақобат қўмитасига ва ҳуқуқни муҳофаза қилувчи органларга қонуний кўриб чиқиш учун юборилган).
Қонунчиликка кўра, умра тадбирларини ташкил этиш ва ўтказишга оид хизматларни лицензияга эга бўлмаган тадбиркорлик субъектлари томонидан кўрсатиш тақиқланган. Шунингдек, фуқароларни умра амалларини бажариш учун Саудия Арабистони подшоҳлигига умра визасисиз юбориш тақиқланади.
Умра сафарига боришдан олдин ҳар қандай турфирманинг Дин ишлари бўйича қўмита томонидан тақдим этилган “Умра лицензияси” мавжудлигини суриштириб олишингизни тавсия қиламиз. Ноқонуний турфирма ёки турагентлардан огоҳ бўлинг, дейилади қўмита хабарида.
Қўмита умра зиёратини ташкил этиш ҳуқуқига фақатгина Ўзбекистон мусулмонлари идораси ҳузуридаги Ҳаж-умра маркази ва 12 та ваколатли сайёҳлик компаниялари эга эканлигини эслатиб ўтди: Ihlos travel 1, Yuksak travel Air, Muhtasham travel, Мусаффо туризм хизмати, Risola travel lux, Хоразм умра жамияти, Hikmat Umra Travel, Real Dreams, Travel with family, Sofa Marva tour, B Management ва Safar time exclusive.
Ўзбекистонда умра тадбирларини ташкил этиш
2024 йил июлида Ўзбекистонда умра тадбирларини ташкил этиш ва ўтказиш лицензияланадиган фаолиятнинг алоҳида тури сифатида белгиланди. Ҳукумат қарори билан қуйидаги лицензия талаб ва шартлари жорий этилган. Лицензияга эга бўлмаган тадбиркорлик субъектлари томонидан умра хизматларини кўрсатганлик учун юридик шахсларга солинадиган жарималар миқдорлари БҲМнинг 200 баравари (75 миллион сўм) этиб белгиланган.
Изоҳ (0)