“Браво” кулги жамоасининг аъзоси Умид Умаров 13 март куни 44 ёшни қаршилади. Тасодифан санъатга кириб қолган, собиқ ўқитувчи, айни кунда эса фермер бўлган ижодкор ҳақида нималарни биласиз?
“Қишлоқнинг энг бахтли боласиман”
Умид Умаров 1981 йили Фарғона вилоятининг Данғара туманида ўқитувчи хонадонида дунёга келган. У бахтли ўтган болалиги ҳақида ҳамиша тўлқинланиб гапиради.
— Оилада тўрт ўғилмиз, отам раҳматли ўқитувчи, онам эса боғча тарбиячиси бўлган. Аммо бир оз улғайиб қолганимиздан кейин онам ишдан кетишга ва бизнинг тарбиямиз билан шуғулланишга қарор қилган. Жуда шўх, ерга урса осмонга сапчийдиган бола бўлганман. Аммо ҳеч қачон меҳнатдан қочмасдим. Уйимизда катта узумзор бор эди. У ерда ҳам ишлардик, қўшимчасига балиқ ва чорва молларини боқиш билан ҳам шуғулланардик. Қишлоқнинг энг бахтли боласи бўлганман деб мақтана оламан. Мол боқиш баҳонасида далага чиқиб, ўрдак ва балиқ овлардик, ҳатто, эрмак учун илон овлаган пайтларимиз ҳам бўлган, дейди Умид Умаров.
“Отам ҳеч қачон нолимасди”
Комик отасини хотирлар экан, унинг ниҳоятда қаноатли инсон бўлгани ва болаларини меҳнатга ўргатгани ҳақида гапиради.
— Ҳозир ўйлаб қарасам, отамнинг маоши жуда кам бўлган экан. Аммо унинг бирор марта нолиганини эшитмаганман. Ҳеч тиним билмайдиган инсон бўлган, дарсдан кейин деҳқончилик билан шуғулланарди. Шу боисдан ҳам биз болаликдан меҳнатга ўрганганмиз. Ака-укаларим билан катта узумзорларни ҳам парваришлаш қўлимиздан келарди, дейди Умид Умаров.
“Имтиҳондан икки йил йиқилганман”
Умид Умаров мактабни тамомлаб, университетга ҳужжат топширгани, аммо ҳар гал етмай қолган кичик балл сабаб ўқишга киролмаганини эслайди.
— Ҳўжа қишлоғидаги 34-мактабни тамомлаб катта орзу-умидлар билан Тошкентга келганман. Ўзбекистон Миллий университетининг “Биология” факультетига ҳужжат топширганман. Аммо икки йил кетма-кет “йиқилганман”. Кўп балл етмаса ҳам унчалик алам қилмасди, бор-йўғи 2-3 балл мени икки йил умримни қаритган.
“Учинчи йил ҳам кирмасам уят бўлади”, деб Учкўприк туманидаги қайта тайёрлов курсида ўқишга қарор қилганман. Учинчи уринишда 13 мингта тест савол-жавобларини ёдлаб ўша йили бюджет асосида ўқишга қабул қилинганман, дейди Умид Умаров.
“Санъаткор бўлиш хаёлимда ҳам бўлмаган”
Биолог талабанинг қандай қилиб санъат соҳасига кириб қолгани кўпчилик учун қизиқ бўлса керак.
— Аслида мен санъатга қизиқмаганман. Гапиришим оддий, жайдарича. Университетда ўқиётганимда “Қувноқлар ва зукколар” мусобақаси ўтказиларди. Факультет номидан жамоага қўшилганман. Аслида мен ниманидир ўйлаб гапирмайман, ўзим кўрган, билган қишлоқ одамларининг феъл-атворини олиб чиқаман. Масалан, илонга нос чектирардик деган ҳазилим ҳам аслида ҳақиқат. Болалигимдан бундай номақбул иш билан ҳам шуғулланганман, дейди Умид Умаров.
“17 йил мактабда ишладим”
Умид Умаров 17 йил ўқитувчилик қилгани ва қайси сабабларга кўра бу соҳадан кетишга қарор қилгани ҳақида гапирди.
— Биология ва табиатдан оқилона фойдаланиш бўйича мутахассисман. Аммо бу касбни ташлаб қўйдим, шуғулланмаяпман деёлмайман. Чунки 44 ёшга кирган бўлсам, деярли 40 йил умрим табиат билан уйғунликда ўтди. Ҳозир ҳам деҳқончилик ва чорвачилик билан шуғулланаман. Ўрганганларим анча асқатди.
Университетни битириб, мактабга ишга кирганман. Тошкентнинг Себзор даҳасидаги мактабда 17 йил ишладим. Жуда қаттиққўл ва талабчан бўлганман. Тажриба орттиргандан кейин устозларнинг ҳам даври келади. Мен ҳам ана шу натижага эришаётган пайтимда педагогликдан кетишимга тўғри келди. Фаолиятим санъатга бурилиб кетди, баъзан бундан афсусланаман, дейди Умид Умаров.
“Деҳқончиликнинг сирлари бор”
Умид Умаров фақат санъатнинг ортидан тирикчилик қилмайди. Унинг катта ер майдони бор ва унинг ортидан яхшигина даромад топади.
— 60 сотих ер майдоним, 40 сотих иссиқхонам бор. Ҳар мавсумда турли экинларни экамиз. Буғдой, мош, маккажўхори, ҳандалак, қовун, тарвуз, ловия, картошка саримсоқпиёз, хуллас экинларимизнинг тури кўп. Иссиқхонага эса асосан помидор, бодринг ва булғор қалампири экилади. Боғимиздан эса сара узум, шафтоли ва бодом мевалари халққа етказилади.
Деҳқончиликдан топадиган йиллик даромадим ёмон эмас. Уруғ, ўғит, сув, ер ижараси, ишчи харажати ва техникаларга сарфланган пулдан кейин камида 120 миллион даромад топаман. Тўғри, баъзи йиллари зарар кўрган пайтларим ҳам бўлган. Чунки ҳар соҳада бўлганидек, деҳқончилик ва боғдорчиликнинг ҳам ўзига яраша сирлари бор, дейди “Браво” кулги жамоаси аъзоси Умид Умаров.
“Мен учун энг катта айрилиқ”
Қаҳрамонимиз отасини йўқотгандан кейин руҳий тушкунликка тушгани ва анча ўзини қўлга ололмагани ҳақида гапирди.
— Ҳар бир фарзанд учун ота-онаси идеалидаги инсон бўлади. Онамдан китобсеварликни, отамдан эса меҳнаткашликни ўрганганмиз. Бобур, Собир, Сардор ва Умид деб тўрт ўғлини ёнига олиб, эркак киши учун керак бўладиган ҳунарларни ўргатган. Мана ҳозир балиқчилик билан ҳам шуғулланаман. Чунки отам 7-8-синфлигимиздан бошлаб, кичик ҳовузча қилиб, балиқ боқишни ўргатганди. Нафақат мен бошқа ака-укаларимнинг ҳам бу борада тажрибаси етарлича.
Афсуски, 36 ёшимда отамдан айрилдим. Икки ойдан кейин концерт беришимиз керак эди. Шу қадар руҳий тушкунликка тушганманки, бировни кулдириш тугул, ўзимни қўлга ололмасдим. Бу ҳолат икки йил давом этди. Ҳозир ҳам отам билан боғлиқ хотираларни эсласам, кўнглим бўшаб кетади, дейди Умид Умаров.
“Миллион”нинг бўлинишига нима сабаб бўлган?
Умид Умаров бу саволга ниҳоят қуйидагича жавоб берди.
— Бир сўз билан айтганда нафс сабаб бўлган. Чунки одамларга танилиб, тўйларга таклиф этилишни бошлагандан кейин, ҳар қандай ижодкор соққа қилиб олишим керак дейди. Аммо бу нарса бошқаларга ёқмаган. “Брендни ушлаш керак, тўй ва концертларда чиқилмасин”, деган талаб қўйилган. Турган гапки, бу айримларимизга ёқмаган. Улар гуруҳни тарк этиб алоҳида жамоа бўлишни маъқул кўришган. Икки томон ҳам ўзича ҳақ. Ризқимиз бўлак экан, кетишимиздан ҳеч ким, ҳатто ўзимиз ҳам хурсанд бўлмаганмиз. Шахсан менинг ҳеч кимга адоватим йўқ, ҳаммаларини ҳурмат қиламан, дейди Умид Умаров.
“Миркомил Мусаевнинг кетиши оғир таъсир қилди”
Умид Умаров “Миллион”ни тарк этганлар учун афсусда экани, улар билан боғлиқ хотираларни кўп эслаши ҳақида гапирди.
— Инсон учун илк таркиб барибир қадрли бўлиб қолади. Ҳозиргиларнинг ҳам ижоди зўр, аммо Миркомил ака, Алишер ёки Умид билан боғлиқ яхши хотираларимиз кўп эди. Миркомил Мусаев санъатни тарк этгани, менга жуда оғир таъсир қилди. Ҳатто, хайрлашиш учун ҳам бормадим. Чунки у инсон билан бирга ўқиганмиз, санъатда нимагаки, эришган бўлсак, биргаликда бўлган, дейди Умид Умаров.
“Ҳеч бир аёл идеал эмас”
— Бу йил оила қурганимга 20 йил тўлади, ўғил-қизларим ҳам улғайиб, бўйим тенгги бўлиб қолишди. Ҳеч бир аёл идеал эмас, мана мен зўрман деганининг ҳам ўзига яраша камчиликлари бор. Ҳамма гап сабрда ва бир-бирини қўллаб-қувватлашда бўлса керак. Бўлмаса, оила-оила бўладими, дейди Умид Умаров.
Изоҳ (0)