Сенат “Ўзбекистон Республикасининг айрим қонун ҳужжатларига заргарлик саноатини янада ривожлантиришга қаратилган ўзгартириш ва қўшимчалар киритиш тўғрисида”ги қонунни кўриб чиқиб, маъқуллади.
Ушбу қонун лойиҳаси Олий Мажлис депутатлари томонидан 2024 йил 11 декабрь куни биринчи ўқишда концептуал жиҳатдан кўриб чиқиб, қабул қилинганди.
Сенаторларнинг қайд этишича, заргарлик соҳасида қимматбаҳо металлар ва тошлар, улардан ясалган заргарлик буюмларнинг ноқонуний айланмаси мавжудлиги, тадбиркорлик субъектларига мол-мулк ва ер солиғидаги имтиёзлар етарли эмаслиги ва яна бир қатор мавжуд муаммолар соҳадаги салоҳиятдан тўлақонли фойдаланиш имконини бермаяпти.
Ушбу омиллар инобатга олинган ҳолда қонун билан Маъмурий жавобгарлик тўғрисидаги кодексга ва Солиқ кодексига, “Лисензиялаш, рухсат бериш ва хабардор қилиш тартиб-таомиллари тўғрисида”ги ҳамда “Қимматбаҳо металлар ва қимматбаҳо тошлар тўғрисида”ги қонунларига тегишли ўзгартириш ва қўшимчалар киритилмоқда.
Хусусан, Маъмурий жавобгарлик тўғрисидаги кодексда қимматбаҳо металлар ва қимматбаҳо тошлар муомаласи ва айланмаси соҳасидаги ҳуқуқбузарликлар учун жарима миқдорлари кескин оширилмоқда.
Маъмурий жавобгарлик тўғрисидаги кодексда қимматбаҳо металлар ва тошлардан ясалган заргарлик буюмларнинг ноқонуний айланмасини камайтириш, шунингдек қалбаки, асиллик даражасига мувофиқ бўлмаган заргарлик буюмлари сотилишига барҳам бериш мақсадида ушбу соҳадаги ҳуқуқбузарлик содир этганлик учун БҲМнинг 30 бараваридан 50 бараваригача жарималар назарда тутилмоқда.
Солиқ кодексига киритилаётган ўзгартиришларга асосан “Ўзбекзаргарсаноати” уюшмасининг аъзолари бўлган заргарлик буюмларини ишлаб чиқарувчи якка тартибдаги тадбиркорларга нисбатан 2027 йил 1 сентябрга қадар солиқ имтиёзлари татбиқ этилмоқда.
Айнан шу муддатга қадар мазкур тадбиркорларга ишлаб чиқаришда фойдаланиладиган ер участкалари ҳамда кўчмас мулк объектлари мол-мулк солиғи ва ер солиғини тўлашдан озод қилиниши назарда тутилмоқда.
Қайд этилишича, мазкур қонуннинг қабул қилиниши заргарлик буюмларини ишлаб чиқарувчиларни хом ашё билан таъминланишини яхшиланишига, уларнинг экспорт салоҳиятини ошириш, соҳа корхоналарининг ишлаб чиқариш қувватларидан самарали фойдаланишни таъминлаш, шунингдек аҳолининг сифатли заргарлик маҳсулотларига бўлган эҳтиёжини қаноатлантириш ҳамда республика бюджетига чет эл валютаси ва солиқ тушумларининг кўпайишига хизмат қилади.
Ўзбекистонда заргарлик соҳаси
Шавкат Мирзиёев 2024 йил июнида заргарлик саноатини янада ривожлантириш, заргарлик буюмларини ишлаб чиқариш ва сотиш фаолиятини қўллаб-қувватлаш, тайёр маҳсулотлар экспортини оширишга қаратилган чора-тадбирлар тақдимотида Ўзбекистонда қазиб олинаётган олтиннинг атиги 6 фоизи қайта ишланиб, бор-йўғи 78 миллион долларлик экспорт бўлаётганини қайд этиб, тадбиркорлар учун алоҳида шароитларга эга заргарлик зоналари ташкил қилиниши, соҳага хом ашё етказиш, мутахассис тайёрлаш, ишлаб чиқариш занжири ва сотиш тизимини бутунлай қайта кўриб чиқиш муҳимлигини таъкидлаган эди.
Соҳадаги ишлаб чиқарувчиларни қўллаб-қувватлаш мақсадида “Ҳунарманд” уюшмаси аъзолари учун берилган имтиёзлар “Ўзбекзаргарсаноати” уюшмасига аъзо бўлган заргарлик буюмларини ишлаб чиқарувчи якка тартибдаги тадбиркорларга ҳам татбиқ этиш таклиф этилганди.
2024 йил июлида “Заргарлик буюмларини ишлаб чиқариш соҳасини янада ривожлантириш ва уларнинг рақобатбардошлигини таъминлаш чора-тадбирлари тўғрисида”ги президент фармони қабул қилинди. Унга кўра, 2024 йил 1 ноябрдан чет элда ишлаб чиқарилган заргарлик буюмларини, башарти улар бўйича божхона тўловлари амалга оширилганлигини тасдиқловчи ҳужжатлар бўлмаса, сотувга қўйиш ва чакана савдода реализация қилиш ман этилди. 2027 йил 1 январгача Ўзбекистонга олиб кириладиган тайёр заргарлик буюмларига нисбатан импорт божхона божлари 20 фоиздан 10 фоизгача камайтирилади.
Изоҳ (0)