Афғонистоннинг Мозори Шариф шаҳрида Ўзбекистон савдо уйи очилмоқда, деб хабар берди Савдо-саноат палатаси матбуот хизмати.
Унга кўра, ушбу савдо уйи 220 квадрат метр майдонда жойлашган бўлиб, тадбиркорларга маҳсулотларини Афғонистон бозорига чиқариш, ҳамкорлар топиш ва экспортни кенгайтириш учун қулай платформа яратади. Унда фармацевтика, электротехника ва қурилиш материаллари учун доимий фаолият юритувчи шоурум ва омборхона мавжуд.
Ташриф доирасида Савдо-саноат палатаси раиси Даврон Ваҳобов савдо уйидан ташқари, Афғонистоннинг Баглан вилоятидаги Nasaji Textile Factory тўқимачилик фабрикасида ҳам бўлди ва қўшма кооперация, экспорт ва импорт масалаларини муҳокама қилди.
Nasaji Textile Factory — Афғонистоннинг энг йирик ва қадимий тўқимачилик корхоналаридан бири бўлиб, пахтадан ип-калава, газламалар ва тайёр маҳсулотлар ишлаб чиқаради. Айни пайтда фабрикада 350 дан ортиқ ходим ишламоқда ва ишлаб чиқариш ҳажми босқичма-босқич оширилмоқда. Фабрика маҳаллий бозор билан бирга халқаро экспортга ҳам йўналтирилган.
Учрашув давомида фабрика билан қўшма кооперация йўлга қўйилиши, ўзаро тажриба алмашиш ва ишлаб чиқариш ҳажмини ошириш имкониятлари муҳокама қилинди. Тайёр ва ярим тайёр тўқимачилик маҳсулотларини экспорт қилиш, шунингдек, пахта толаси ва ип-калавани Ўзбекистонга импорт қилиш юзасидан келишувга эришилди.
Даврон Ваҳобов Baglan Sugar Company шакар заводига ҳам ташриф буюрди. 1938 йилда ташкил этилган мазкур корхона Афғонистондаги энг йирик шакар ишлаб чиқарувчи корхоналардан бири ҳисобланади.
Учрашув давомида ишлаб чиқариш жараёнлари, технологик имкониятлар ва қўшма ҳамкорлик йўналишлари муҳокама қилинди. Шунингдек, шакар маҳсулотларини Ўзбекистонга экспорт қилиш ва завод учун зарур хом ашёни импорт қилиш масалалари бўйича фикр алмашилди.
Ташриф доирасида икки томонлама ҳамкорликни мустаҳкамлаш ва шакар саноатидаги савдо-сотиқ алоқаларини кенгайтириш юзасидан келишувларга эришилди.
Аввалроқ Ўзбекистон ва Афғонистон ўзаро савдо ҳажмини 3 миллиар долларга етказмоқчилиги ҳақида хабар берилган эди. 1 март куни Ўзбекистон инвестициялар, саноат ва савдо вазири Лазиз Қудратов “Термиз” халқаро савдо марказига ташриф буюрган Афғонистон савдо вазири Нуруддин Азизий бошчилигидаги делегация билан бу борада аниқ чора-тадбирларни белгилаб олди.
Изоҳ (0)