Қирғизистон, Тожикистон ва Ўзбекистон чегаралари туташган нуқта кўрсатилди

Қирғизистон Миллий хавфсизлик қўмитаси раҳбари Қамчибек Ташиев депутатларга Тожикистон ва Ўзбекистон чегаралари билан туташган нуқтани кўрсатди. У мазкур масала бўйича 2007 йилдан бери уч томонлама музокаралар олиб борилаётганини айтди. Бу ҳақда “АКИпресс” хабар берди.

Ташиевнинг сўзларига кўра, бугунгача ҳукумат делегациялари 6 марта учрашган.

Томонлар чегараларнинг туташган нуқтаси бўйича келишувга эриша олмаган эди. 2025 йил март ойида Қирғизистон-Тожикистон чегараси тўғрисидаги шартнома имзолангандан сўнг, Душанбе шаҳрида уч томонлама учрашув бўлиб ўтди, унда уч давлат келишувга эришди ва уч чегаранинг туташ нуқтасини белгилаб олди, деди у.

Қирғизистон Миллий хавфсизлик қўмитаси раҳбари харитада туташиш нуқтаси қаерда эканини кўрсатди.

Кўк рангда учта чегаранинг туташган нуқтаси кўрсатилган. Аввалроқ яшил ранг билан белгиланган жойни Тожикистон, қизил ранг билан эса Ўзбекистон таклиф қилганди. Улар бу жойларни туташиш нуқтаси сифатида таклиф қилишган. Агар рози бўлганимизда, барча йўллар мамлакатимиз ташқарисида қолган бўларди. Тахминан 100 гектар ер Қирғизистон ҳудудида қолди, бу ҳам бизнинг ғалабамиз ҳисобланади. Бу ерда одамлар яшашмайди, аммо бу бизнинг ҳудудимиз ва ундан йўлимиз ўтади, дея таъкидлади у.

13 март куни Қирғизистон президенти Садир Жапаров ва Тожикистон президенти Эмомали Раҳмон икки мамлакат ўртасидаги Давлат чегараси тўғрисидаги битимни имзолади. Қирғизистон—Тожикистон чегарасининг умумий узунлиги 1 минг 6,84 километрни ташкил этади, шундан 519,9 километри 2011 йилгача, 486,94 километри эса сўнгги уч йил ичида аниқланган. Ўнлаб баҳсли участкалар туфайли у ерда вақти-вақти билан қуролли тўқнашувлар юз бериб турарди.

8 январь куни Ўзбекистон, Қирғизистон ва Тожикистон ҳукуматлари раҳбарлари уч томонлама учрашув ўтказди. Томонлар ўртасида давлат чегаралари масалалари бўйича илгари эришилган келишувларга оид музокаралар бўлиб ўтди. Қирғизистон Хитой, Қозоғистон, Тожикистон ва Ўзбекистон билан чегарадош. Хитой ва Қозоғистон билан чегара бўйича барча баҳсли масалалар бир неча йил олдин ҳал қилинган.