Шавкат Мирзиёев Покистон бош вазири билан музокара олиб борди. Нималар муҳокама қилинди?

Ўзбекистон ва Покистон етакчилари стратегик шерикликни кенгайтиришнинг устувор йўналишларини белгилаб олдилар, деб хабар бермоқда Президент матбуот хизмати.

Тошкентда расмий ташриф билан келган Покистон бош вазири тантанали кутиб олинганди. Маросимдан сўнг тор доирада ва расмий делегациялар иштирокида музокара ўтказилди. Музокараларда савдо-иқтисодий ҳамкорликни кенгайтириш масалаларига алоҳида эътибор қаратилди. Қабул қилинган “йўл харитаси” асосида товар айирбошлаш ҳажмини 2 миллиард долларга етказиш бўйича ўзаро мувофиқлашган чоралар кўриш муҳимлиги таъкидланди.

Имтиёзли савдо тўғрисидаги битим доирасида товарлар рўйхатини кенгайтириш, фитосанитария ва карантин талабларини, божхона тартиб-таомилларини ўзаро соддалаштириш, стандартларни яқинлаштириш, электрон савдо платформаларини интеграция қилиш, харидларда иштирок этиш имкониятини таъминлаш, банклараро ҳисоб-китоблар механизмларини такомиллаштириш ва бошқалар устувор вазифалар сифатида белгиланди.

Етакчи компанияларнинг фармацевтика, электротехника, қишлоқ хўжалиги машинасозлиги, геология ва минерал ресурслар, тўқимачилик, чарм саноати ва бошқа тармоқларда кооперация лойиҳаларини амалга ошириш режалари кўриб чиқилди.

Ҳудудлар ўртасидаги ишбилармонлик ва маданий алоқаларни рағбатлантириш мақсадида давлат раҳбари Ўзбекистонда икки мамлакат ҳудудлари форумини ўтказишни таклиф этди.

Ўзбекистон ва Покистон етакчилари транспорт жиҳатидан ўзаро боғлиқликни кучайтириш ва транзит салоҳиятини рўёбга чиқариш масалаларига ҳам алоҳида тўхталди. Кейинги бир неча йилда Ўзбекистон—Афғонистон—Покистон мултимодал йўлаги орқали юк ташиш ҳажми 5 баробар кўпайгани мамнуният билан қайд этилди. Юк айланмаси ҳажмини янада ошириш мақсадида қўшма транспорт-логистика компаниясини ташкил этишга келишиб олинди. Трансафғон темир йўлини қуриш лойиҳасини амалда илгари суриш мақсадида биргаликдаги саъй-ҳаракатларни мувофиқлаштириш муҳим экани таъкидланди.

Ҳукуматлараро комиссиянинг навбатдаги йиғилишини жорий йил июль ойида Лаҳор шаҳрида ўтказишга келишиб олинди.

Томонлар маданий-гуманитар ва туризм алмашинувини янада кенгайтириш муҳимлигини қайд этдилар. Шу маънода, ўзаро Маданият ҳафталиклари ва туризм дастурлари тақдимотларини ўтказишга келишиб олинди.

Халқаро ва минтақавий аҳамиятга молик долзарб масалалар юзасидан ҳам фикр алмашилди. БМТ, Қўшилмаслик ҳаракати, Ислом ҳамкорлик ташкилоти, ШҲТ ва бошқа кўп томонлама тузилмалар доирасида ўзаро қўллаб-қувватлашни давом эттириш муҳимлиги қайд этилди.

Ўзбекистон президенти ва Покистон бош вазири терроризм, радикализм, исломофобия ва хавфсизликка таҳдид солаётган бошқа замонавий хатарларга қарши курашишда саъй-ҳаракатларни бирлаштириш зарурлигини таъкидлади.

Ҳамкорликнинг янги йўналишларини ишлаб чиқиш мақсадида Олий даражадаги стратегик шериклик кенгашини таъсис этиш ва унинг биринчи йиғилишини келгуси йилда ўтказишга келишиб олинди.

Олий даражадаги музокаралар якунида эришилган келишувлар ва имзоланган битимларни ўз вақтида амалга ошириш бўйича қўшма “йўл харитаси”ни ишлаб чиқиш ва тасдиқлаш тўғрисида қарор қабул қилинди.

Покистон бош вазири Шавкат Мирзиёевнинг таклифига биноан 25 февраль куни расмий ташриф билан Ўзбекистонга келганди. Уни Тошкент халқаро аэропортида бош вазир Абдулла Арипов ва бошқа расмийлар кутиб олди. Қисқа суҳбатдан сўнг Шаҳбоз Шариф Абдулла Арипов ҳамроҳлигида “Янги Ўзбекистон” боғига борди ва Мустақиллик монументи пойига гул қўйди. 26 февраль куни Тошкент шаҳридаги Халқаро конгресс марказида Покистон бош вазири расмий кутиб олишга бағишланган тантанали маросим бўлиб ўтди.

Саммит якунида қўшма декларация ва қатор икки томонлама ҳужжатлар қабул қилиниши режалаштирилган. Ташрифнинг ишбилармонлик дастури доирасида етакчилар Ўзбекистон—Покистон қўшма бизнес форумида ҳам иштирок этади.

Ўзбекистон—Покистон муносабатлари

Покистон – Ўзбекистон мустақиллигини биринчилардан бўлиб, 1991 йилнинг 20 декабрида тан олган. Ўзаро дипломатик муносабатлар эса 1992 йил 10 майдан бошлаб ўрнатилган. Икки давлат ўртасидаги иқтисодий алоқалар кейинги йилларда янги босқичга кўтарилди.

2019 йилдаги 122 миллион долларлик савдо айланмаси 2023 йилга келиб 387 миллион долларга етди. 2024 йилда товар айирбошлаш ҳажми 400 миллион доллардан ошди, қўшма корхоналар сони 130 тага етди. Карачи ва Тошкентда савдо уйлари очилди. Тошкент ва Лаҳор ўртасида тўғридан тўғри авиақатновлар тикланди.

Фаол сиёсий мулоқотлар, самарали парламентлараро ва идоралараро алмашинувлар давом этмоқда.