Миннесотадан беш нафар республикачи сенатор “Трампга муросасизлик синдроми”ни (ТDS) руҳий касаллик сифатида таснифлаш тўғрисидаги қонун лойиҳасини тақдим этмоқчи. Улар буни Дональд Трамп президентлигига нисбатан “параноянинг ўткир бошланиши” деб таърифламоқда. Бу ҳақда Newsweek хабар берди.
Оқ уй матбуот котиби Каролин Левитт ва коммуникация директори Стивен Чеунг илгари кўплаб танқидчиларни ушбу синдромда айблаган эди. Бироқ ТDS'ни руҳий касаллик сифатида расман тан олиш ташаббуси руҳий саломатлик диагностикасининг сиёсийлаштирилиши борасида хавотир уйғотмоқда. Мутахассисларнинг фикрича, бундай ташхис сиёсий қарашлар ва норозилик билдириш ҳуқуқини чеклаш воситаси сифатида нотўғри ишлатилиши, шунингдек, бошқа руҳий касалликларга эътибор камайишига олиб келиши мумкин.
17 март куни қонун лойиҳаси Миннесота Сенатининг Соғлиқни сақлаш ва аҳолига хизмат кўрсатиш қўмитаси муҳокамасига киритилиши режалаштирилган.
Республикачи қонунчиларга кўра, ТDS белгилари орасида “Трамп сабаб юзага келган умумий истерика” ҳам бор. Уларнинг фикрича, бу ҳолат президентнинг сиёсий қарор ва ҳаракатларини руҳий бузилиш аломатлари сифатида талқин қилишга сабаб бўлади.
Шунингдек, синдром аломатлари сифатида Трампга нисбатан кучли оғзаки нафрат ҳамда унинг тарафдорларига қарши “тажовузкорлик ва зўравонлик ҳаракатлари” келтирилган. Қонун лойиҳаси муаллифлари “Трампга муросасизлик синдроми” атамасини штатнинг руҳий касалликлар билан боғлиқ қонунларига киритишни таклиф қилмоқда.
Изоҳ (0)