Minnesotadan besh nafar respublikachi senator “Trampga murosasizlik sindromi”ni (TDS) ruhiy kasallik sifatida tasniflash to‘g‘risidagi qonun loyihasini taqdim etmoqchi. Ular buni Donald Tramp prezidentligiga nisbatan “paranoyaning o‘tkir boshlanishi” deb ta’riflamoqda. Bu haqda Newsweek xabar berdi.
Oq uy matbuot kotibi Karolin Levitt va kommunikatsiya direktori Stiven Cheung ilgari ko‘plab tanqidchilarni ushbu sindromda ayblagan edi. Biroq TDSni ruhiy kasallik sifatida rasman tan olish tashabbusi ruhiy salomatlik diagnostikasining siyosiylashtirilishi borasida xavotir uyg‘otmoqda. Mutaxassislarning fikricha, bunday tashxis siyosiy qarashlar va norozilik bildirish huquqini cheklash vositasi sifatida noto‘g‘ri ishlatilishi, shuningdek, boshqa ruhiy kasalliklarga e’tibor kamayishiga olib kelishi mumkin.
17-mart kuni qonun loyihasi Minnesota Senatining Sog‘liqni saqlash va aholiga xizmat ko‘rsatish qo‘mitasi muhokamasiga kiritilishi rejalashtirilgan.
Respublikachi qonunchilarga ko‘ra, TDS belgilari orasida “Tramp sabab yuzaga kelgan umumiy isterika” ham bor. Ularning fikricha, bu holat prezidentning siyosiy qaror va harakatlarini ruhiy buzilish alomatlari sifatida talqin qilishga sabab bo‘ladi.
Shuningdek, sindrom alomatlari sifatida Trampga nisbatan kuchli og‘zaki nafrat hamda uning tarafdorlariga qarshi “tajovuzkorlik va zo‘ravonlik harakatlari” keltirilgan. Qonun loyihasi mualliflari “Trampga murosasizlik sindromi” atamasini shtatning ruhiy kasalliklar bilan bog‘liq qonunlariga kiritishni taklif qilmoqda.
Izoh (0)