Киев маълумотларига кўра, Шимолий Корея ҳарбийлари бир неча ҳафта давом этган танаффусдан сўнг Курск вилоятида яна фаол жанговар ҳаракатларга қайтган. Бу ҳақда Украина президенти Владимир Зеленский ватандошларига анъанавий кечки видеомурожаатида, шунингдек, Reuters агентлигига берган интервьюсида айтиб ўтди.
Курск операцияси ҳудудларида янги ҳужумлар бўлди — Россия армияси яна Шимолий Корея аскарларини жалб қилди, деди Украина раҳбари.
Зеленскийнинг сўзларига кўра, Курск яқинидаги жангларда “кўплаб босқинчилар”, хусусан, рус ва Шимолий Корея ҳарбийлари йўқ қилинган.
Унинг қўшимча қилишича, Курск вилоятида 60 минг россиялик ҳарбийлар тўпланган.
Жорий йилнинг 30 январь куни The New York Times газетаси Шимолий Корея ҳарбийлари оғир йўқотишлардан сўнг Курск вилоятида фронт чизиғидан олиб кетилгани ҳақида ёзган эди. Украина ва АҚШ расмийларидан иборат нашр суҳбатдошларининг сўзларига кўра, бу вақтга келиб КХДР ҳарбий хизматчилари икки ҳафтача фронтда кўринмаган. Кейинроқ бу маълумотни Украина махсус операция кучлари, шунингдек, Жанубий Корея разведкаси тасдиқлади.
Украина армияси Бош штабининг ҳисоб-китобларига кўра, КХДРнинг Курск вилоятидаги контингентининг умумий йўқотишлари 4000 га яқин кишини ташкил этди: Шимолий Кореянинг учта шартли бригадасидан бири амалда йўқ қилинган, иккитаси жанговар қобилиятини йўқотган.
Россия ва КХДР ҳамкорлиги
Россия ва Шимолий Корея уруш бошланганидан кейин ҳарбий соҳадаги ҳамкорликни кучайтира бошлади. 2024 йил июнь ойида Россия президенти Владимир Путин Шимолий Кореяга ташриф буюриб, Ким Чен Ин билан ҳужум содир бўлган тақдирда бир-бирини қўллаб-қувватлашни назарда тутувчи, шунингдек, Ғарб санкцияларига қарши ҳамкорликни ўз ичига олган кенг қамровли стратегик шартнома имзолаганди.
Украина армияси Курск вилоятида шимолий кореялик икки аскарни асирга олган. Президент Владимир Зеленский 12 январь куни улар сўроққа тутилгани акс этган видеони эълон қилди. Сўроқ пайтида КХДР аскарлари қаердалигини билмаслиги, уларга бу фақат ўқув машғулоти деб айтилганини таъкидлаган.
Изоҳ (0)