Шимолий Корея раҳбари Ким Чен Ин ядро материаллари ишлаб чиқарувчи корхона ва ядро қуроллари илмий-тадқиқот институтига ташриф буюрди. Бу ҳақда Associated Press хабар берди.
У қурол-яроғ туридаги ядровий материаллар ишлаб чиқаришни кўпайтириш зарурлигини таъкидлади.
“Ҳозирги кўтаринки руҳни янада кучайтириш, қурол-яроғ туридаги ядровий материаллар ишлаб чиқариш режасини ошириб бажариш ва мамлакатнинг ядровий қалқонини мустаҳкамлашда тарихий ютуқларга эришиш лозим”, деган КХДР етакчиси.
Кимнинг ташрифи, Корея ярим оролини ядросизлантириш бўйича халқаро саъй-ҳаракатларга қарамай, унинг ҳамон ядровий дастурни ривожлантиришга эътибор қаратаётганини кўрсатмоқда.
“БМТ бу ҳаракатлардан ташвишда, чунки улар ядровий қуролсизланиш ва ядро қуролини тарқатмаслик бўйича глобал тартибига путур етказмоқда”, деган БМТ бош котиби ўринбосари Розмари Дикарло.
Трамп ва Ким Чен Ин
АҚШ президенти Дональд Трамп бир неча кун аввал Ким Чен Ин билан мулоқотни қайта тиклаш ниятида эканини айтганди. Ўзининг биринчи муддати давомида у Шимолий Корея етакчиси билан бир неча бор учрашган. АҚШ Миллий хавфсизлик кенгаши вакили Брайан Хюз президент Шимолий Кореяни тўлиқ денуклеаризация қилишга эришишини тасдиқлади.
Трампнинг инаугурациясидан бир неча кун олдин Пхеньян бир нечта қисқа масофали баллистик ракеталарни учирди. Кўпгина таҳлилчилар Шимолий Корея раҳбариятининг ҳаракатларини Қўшма Штатлардан санкцияларни юмшатиш ва сиёсий ён беришларга эришишга қаратилган стратегиянинг бир қисми сифатида кўрмоқда.
Изоҳ (0)