Шимолий Корея 26 январь куни стратегик қанотли бошқариладиган ракеталарни синовдан ўтказди. Бу ҳақда Марказий телеграф агентлиги хабар берди.
Шимолий Корея ҳарбийлари томонидан қўлланадиган “стратегик” таърифи бундай ракеталар ядровий қуролга эгалигини англатади.
“Учирилган стратегик қанотли ракеталар 7,507-7,511 сония ичида 1500 километрлик овал ва 8 шаклида траектория бўйлаб учиб, кейин нишонга аниқ тегди. Муҳим қуролларни синаш қўшни давлатлар хавфсизлигига ҳеч қандай салбий таъсир кўрсатмади”, дейилади хабарда.
Синовларда иштирок этган КХДР раҳбари Ким Чен Ин “узоқ муддатли ва абадий тинчлик ҳамда барқарорликни таъминлаш” бўйича “муҳим вазифани масъулият билан бажариш”га сўз берди.
Жанубий Корея ҳарбий кучлари КХДРдан Сариқ денгиз томон бир нечта қанотли ракеталар учирилганини тасдиқлади. Уларнинг хусусиятлари ҳозирда АҚШ ва Жанубий Корея разведка хизматлари томонидан ўрганилмоқда.
КХДР Ташқи ишлар вазирлигининг АҚШ ва Жанубий Кореяга қарши баёноти
26 январь куни Шимолий Корея Ташқи ишлар вазирлиги АҚШ ва Жанубий Кореяга нисбатан анча кескин баёнот эълон қилди. Ҳужжатда таъкидланишича, улар “ҳарбий провокацияларнинг сезиларли даражада кучайиши оқибатида минтақадаги вазиятнинг ёмонлашуви учун жавобгарликдан қочиб қутула олмайди”.
Шимолий Корея Ташқи ишлар вазирлиги АҚШ ва Жанубий Кореянинг сўнгги пайтларда ўтказилган ҳарбий машғулотларини санаб ўтиб, уларни “КХДРга қарши ташвишли ҳарбий провокациялар” сифатида баҳолади.
“Бундай ҳаракатларга жавобан кўзгули чоралар кўрилади. Корея яримороли ва минтақадаги хавфсизлик ҳолати кундан кунга ёмонлашиб бораётганининг асосий сабаби айнан АҚШнинг ҳарбий устунликка эришиш учун бор кучини сарфлаётганидир”, дейилади баёнотда.
Пхеньян “АҚШга фақат ўта қатъий чоралар билан қаршилик кўрсатишини” ваъда қилмоқда.
Изоҳ (0)