“Қалбим чечаги”даги Юн Хи — актриса Чхве Жин Сил нима сабабдан машҳурлик чўққисида ҳаётига якун ясаган?

Ўзбек томошабинларига “Қалбим чечаги” сериалидаги Юн Хи образи билан яхши таниш бўлган актриса Чхве Жин Силни кўпинча Жанубий Кореяда “миллий актриса” деб аташади. Чхве Жин Сил тўлиқ бўлмаган камбағал оилада, онаси ва укаси билан яшаган. У болалигидан машҳур актриса бўлишни орзу қиларди.



Чхве мактабни тугатганидан сўнг модел бўлиб ишлай бошлади. Унинг Samsung рекламасида ижро этган садоқатли уй бекаси образи кенг жамоатчилик эътиборига тушди ҳамда уни бутун Кореяга машҳур қилди.  

1988 йилда Чхве актрисалик фаолиятини бошлади ҳамда “Чосоннинг 500 йиллиги” дорамасида иккинчи даражали ролни ижро этди. Икки йилдан сўнг у “Жанубий Кореядаги Шимолий кореялик партизан” фильмида бош ролни ижро этди. 1997 йилда тақдим этилган “Қалбим чечаги” сериали уни бутун дунёга машҳур қилди. Сериал нафақат Жанубий Корея, балки бир нечта хорижий мамлакатларда катта қизиқиш билан томоша қилинди, ундаги қўшиқлар эса томошабинлар қалбидан муносиб жой эгаллади. 



Чхве ўзининг 20 йиллик карьераси мобайнида 18 та фильм ва 20 та дорама, шунингдек, 140 та реклама ролигида суратга тушди. Чхве “Энг яхши актриса” сифатида “Гранд белл” мукофотини ҳам қўлга киритган.  

Шахсий фожиалар

Бироқ Чхвенинг ёрқин карьерасига шахсий ҳаётдаги кетма-кет фожиалар соя сола бошлади. Чхве сўнгги қадамни ташлашга ундаган “заҳарли” виртуал миш-мишлар, киберқўрқитиш қурбонига айланди.

1994 йилда актрисанинг собиқ менежери, кино саноатидаги нуфузли шахс Пе Бён Су актрисанинг гастроллар бўйича менежери томонидан ўлдирилади. Чхве гувоҳ сифатида терговга жалб қилинади, бироқ одамлар ўртасида унинг ҳам ушбу қотилликка алоқадор экани ҳақида гап-сўзлар тарқалади. Ушбу гап-сўзлар асоссиз бўлса-да, актрисанинг жамиятдаги имижига путур етади. 1995 йилда актриса жиддий йўл-транспорт ҳодисасига учрайди ва тез-тез таъқиб қурбонига айлана бошлайди. 1996—1998 йилларда актрисани ўғирламоқчи бўлишади.

Зўравон эр

2000 йилда Чхве Жин Силнинг профессионал бейсболчи Чо Сон Мин билан никоҳи Жанубий Кореядаги энг кўп муҳокама қилинган мавзуга айланди. Жуфтлик 2001 йилда ўғил фарзанд кўришди ҳамда унга Хван Хи деб исм қўйишди. 2003 йилда уларнинг оиласида Жун Хи исмли қиз фарзанд дунёга келди. Уларнинг турмушини бахтли деб атаб бўлмасди.

Бутун никоҳ давомида Чо ОАВни рафиқасини ёмон уй Бекаси сифатида кўрсатиш учун ишлатиб келган. Бироқ оиладаги муаммоларда айбдор унинг ўзи эди. Чо актрисага бир неча марта хиёнат қилган, шунингдек актрисанинг онасидан катта миқдорда қарз бўлган. Бундан ташқари бейсболчи Чхвени тинмай ҳақорат қилар, ҳатто 2002 йилда у иккинчи фарзандига ҳомиладор бўлган пайтда унга қўл ҳам кўтарган. Бироқ Чо ОАВга ушбу жанжални рафиқаси бошлагани ҳақида сўзлаб берган. 2004 йилда Чхве яна бир бор турмуш ўртоғи томонидан калтакланган. Ўша йилнинг сентябрьида эса жуфтлик ажримга ҳужжат топширади.
Бу пайтга келиб, Чхве зўравон турмуш ўртоғининг устидан тегишли ташкилотларга арз қилган эди. Бироқ фарзандлари учун васийликни қўлга киритиш учун эрининг устидан ёзган шикоят аризасини қайтиб олган, шунингдек унинг онасидан олган қарзларидан ҳам воз кечади.  

Ажрим жараёнида актриса фарзандларига васийлик қилиш ҳуқуқини қўлга киритади, бироқ унинг эрига ҳам фарзандлари билан кўришиб туриш имконияти берилади.

Актрисанинг зўравон эри ажримдан кейин ҳам уни тинч қўймайди. У ОАВ орқали актриса ҳақида турли бўҳтонларни ёғдириб, уни обрўсизлантиришга ҳаракат қилади.  Чхве унинг бу ишларига шунчаки қараб тура олмайди ҳамда 2004 йилда ўзини оилавий зўравонлик қурбони дея эълон қилади. Бироқ қилмиши учун у таскин эмас, балки янада қатъийроқ жазо олади.

Ўша вақтда актриса  Шинҳан Engineering анд Construction брендининг амбассадори эди. Бироқ у эри томонидан калтаклангани акс этган суратларини ОАВда чоп эттирганидан сўнг компания юзлари шилинган ва шишиб кетган ҳолатда кўрингани учун “омма олдида ўзини муносиб тута олмаганликда” айблади ҳамда актриса билан ҳамкорликни тўхтатди. Шунингдек компания Чхведан шартномани бузганликда айблаб, товон пули талаб қилди, бироқ актриса ушбу ишда ғолиб чиқди.

 
Карьеранинг қайта тикланиши

2005 йилда “Менинг пуштиранг ҳаётим” сериалидаги иштироки унинг карьерасини қайта тиклади. Ушбу сериал томошабинлар ва танқидчиларнинг юқори эътирофларига сабаб бўлди.

Актриса 2008 йилда “Сўнгги можаро” дорамасида яна бир муваффақиятли ролни ижро этди. Дорама нафақат Жанубий Корея, балки бутун дунёда машҳурликка эришди. Продюсерлар унинг иккинчи мавсуми ҳам молиялаштирилишини маълум қилди. Бироқ Чхве дораманинг иккинчи мавсумида суратга тушишга улгурмади…

 Яна бир туҳмат

2008 йилнинг сентябрьида машҳур комик актриса Чон Сон Хининг турмуш ўртоғи Ан Же Хван ўз машинасида ўлик ҳолда топилади. У катта қарз туфайли келиб чиққан стресс оқибатида ўз жонига қасд қилган. Чхве марҳумнинг рафиқаси Чоннинг яқин дугонаси эди. Шунинг учун дафн маросимида Чхве дугонаси учун қайғуда эканлигини намоён этди. Бироқ дафн маросимидан сўнг интернетда марҳум актрисадан фоизга пул олиб тургани, шу сабаб ҳам унинг ўлимида Чхвенинг айби бор эканлиги ҳақида гап-сўз тарқалди. Чхве ушбу гап-сўзларни ким тарқатганини аниқлаштириш мақсадида полицияга мурожаат қилади. Охир-оқибат полиция ушбу миш-мишларни тарқатган қўриқлаш компанияси ходимини қўлга олади.

Сўнгги қадам

Актриса ҳаётида юз бераётган муттасил стрессларга ортиқ тоқат қила олмайди. 2008 йилнинг 2-октябрь куни актриса ўз уйидан осилган ҳолда топилади. Унинг ўлимидан сўнг мамлакатда ўз жонига қасд қилиш ҳолатлари кескин ортиб кетади. Ёнсей университети қошидаги Северанс руҳий касалликлар шифохонаси психиатри Мин Сон Гилнинг айтишича, Чхвенинг ўлими Вертер эффектини юзага келтириб, мамлакатдаги суицидлар 16,23 фоизга ортиб кетган.

Ўлимидан кейин ҳам тинч қўйилмаган актриса

Ўлимидан кейин ҳам Чхве бир неча марта ҳурматсизликка дуч келади. 2009 йилнинг 4 июнида мамлакат олий суди Шинхан компанияси томонидан Чхвега нисбатан айбловни асосли деб топади. Қайта кўриб чиқилган иш бўйича, Чхве ўзини оилавий зўравонлик қурбони сифатида кўрсатиб “ижтимоий шарафига мос иш тутмаганликда” айбдор деб топилади. Ушбу қарор чиқарилганидан бир ой ўтиб 2009 йилнинг 15 августида Чхвенинг ҳоки у дафн қилинган жойдан ўғирлаб кетилади.

Полиция ўғрини излаб топади, у актрисанинг ҳокини уйидаги чиқинди идишига ташлагани аниқланади. Шу тариқа Чхвенинг ҳоки Гапсан паркидаги янги қабрга қўйилади. Ҳозирда ушбу масканда Чхвенинг шарафига кичик хотира боғи барпо этилган.
Чхвенинг ўлимидан кўп ўтмай, унинг укаси ва менежери ҳам ўз жонига қасд қилган. Айтилишича, актрисанинг ўлими уларга қаттиқ таъсир кўрсатган. Орадан тўрт йил ўтиб, унинг собиқ эри Чо Сон Мин ҳам суицид орқали ҳаётдан кўз юмган.