Исроил 5 февраль куни БМТнинг Инсон ҳуқуқлари бўйича кенгашидан чиқди. Мамлакат ташқи ишлар вазири Гидеон Саар бу ҳақда маълум қилди.
“(Кенгаш) анъанавий тарзда инсон ҳуқуқларини бузувчиларни ҳимоя қилиб, уларга эътибордан четда қолишга имкон берган ва бунинг ўрнига Яқин Шарқдаги ягона демократия — Исроилни шафқатсизларча қоралашга ҳаракат қилган”, дея даъво қилди Гидеон Саар.
У мазкур “орган инсон ҳуқуқларини тарғиб қилиш ўрнига демократик мамлакатга ҳужум қилиш ва антисемитизмни ёйишга эътибор қаратгани”ни таъкидлади.
“Бизга нисбатан дискриминация аниқ кўриниб турибди: БМТ Инсон ҳуқуқлари кенгашида Исроил кун тартибидаги банд фақат унга бағишланган ягона давлатдир”, деди вазир.
У кенгаш Исроилни қораловчи 100 дан ортиқ резолюция қабул қилгани, бу умумий резолюцияларнинг 20 фоизидан кўпроғини ташкил этиши билдирди. Ташқи ишлар вазири бу Эрон, Куба, Шимолий Корея ва Венесуэлага қарши қабул қилинган резолюциялардан ҳам кўплигини таъкидлади.
БМТ Инсон ҳуқуқлари бўйича кенгаш: Исроил ўзи аъзо бўлмаган кенгашдан чиқа олмайди
Исроил БМТнинг Инсон ҳуқуқлари бўйича кенгаши таркибидан чиқа олмайди, чунки у органнинг 47 аъзосидан бири эмас. Бу ҳақда БМТ органи расмий вакили Паскал Сим маълум қилди. У Исроил кузатувчи мақомига эгалиги, бу эса аъзоликка тенг эмаслигини таъкидлади.
“Кенгашдаги кузатувчи давлат ўзи аъзо бўлмаган орган таркибидан чиқиши мумкин эмас”, деб тушунтирди Сим.
Орган вакилининг қўшимча қилишича, Кенгаш БМТга аъзо ҳар бир давлатнинг “Кенгаш аъзоси ёки кузатувчиси бўлишидан қатъи назар” орган ишида иштирок этишини “олқишлайди ва рағбатлантиради”.
АҚШ ҳам Инсон ҳуқуқлари кенгашидан чиқди
АҚШ президенти Дональд Трамп 5 февраль куни ўз мамлакатини БМТ Инсон ҳуқуқлари кенгашидан чиқарганди. Саар Исроил номидан бу қарорни маъқуллаган ва унинг мамлакати камситишларга “бошқа чидай олмаслигини” қайд этган.
“Мен ҳар доим БМТнинг улкан салоҳияти борлигини ҳис қилганман. Аммо ҳозир у яхши бошқарилмаяпти ва ўз ишини бажармаяпти”, деган Трамп АҚШнинг ташкилотлардан чиқиши тўғрисидаги фармонни имзолаш чоғида.
Трамп Исроил бош вазири Биньямин Нетаньяху билан учрашган куни мамлакатнинг БМТ Инсон ҳуқуқлари кенгашидан чиқиши тўғрисидаги фармонни имзолади. Худди шу фармон билан Трамп Фаластинлик қочқинларга ёрдам кўрсатиш агентлиги (UNRWA)дан чиқди.
Изоҳ (0)