Шимолий Корея Украинада ярадор бўлган ҳарбийларни даволашда Россияга фаол ёрдам бермоқда. Бу ҳақда Москванинг Пхеньяндаги элчиси Александр Матсэгора хабар берди.
Унинг сўзларига кўра, КХДРда россияликлар “ҳар доим жуда ижобий, дўстона” қабул қилинган ва сўнгги йилларда бу “янада сезиларли” тус олган.
Корея санаторийлари ва шифохоналарида юзлаб яраланган рус ҳарбийларини реабилитация қилиш қардошлик муносабатининг яққол мисоли, деди Матсэгора.
Унинг фикрича, бу “умумий тарих” ва “миллий характерларнинг ўзига хослиги” билан боғлиқ. Диплопатнинг таъкидлашича, шимолий кореяликлар ҳамма жойда россияликларни “табассум билан кутиб олишади, рус тилида гаплашишга ҳаракат қилишади, ўз ёрдамларини таклиф қилишади”.
Масалан, аскарларни реабилитация қилишдан ташқари, 2023 йилнинг ёзида Япон денгизи соҳилидаги “Сондовон” болалар оромгоҳи ҳалок бўлган аскарларнинг фарзандларини қабул қилди, даволаниш, парвариш ва овқатланиш мутлақо бепул эди. Биз дўстларимизга харажатларининг ҳеч бўлмаганда бир қисмини қоплашни таклиф қилганимизда, улар чин дилдан хафа бўлишди ва бундан кейин ҳеч қачон бундай қилмасликни сўрашди, дея қўшимча қилди Матсэгора.
2024 йилнинг июнь ойида Россия президенти Владимир Путин ва КХДР етакчиси Ким Чен Ин де-факто ҳарбий иттифоқни назарда тутувчи кенг қамровли стратегик шериклик тўғрисидаги шартномани имзолаган эди. Шундан сўнг Шимолий Кореянинг 12 минг нафаргача аскари Россияга етиб келди ва унинг армиясига Украина билан урушда ёрдам бера бошлади.
Маълумотларга кўра, улар Курск вилоятидаги жангларга жалб қилинган. Жанубий Корея разведкаси Москва Пхеньянга ҳар бир ҳарбий учун 2 минг доллар тўлашини, бу КХДР фуқаросининг 83 йиллик маошига тенг эканини таъкидлаган.
Жорий йилнинг январь ойи ўрталарига келиб, Шимолий Корея жангларда Россияга юборилган 4 мингга яқин аскарини йўқотди, жумладан, мингга яқин аскар ҳалок бўлди, деб ёзади BBC рус хизмати Ғарб разведка маълумотларига таяниб.
Нашр бунинг асосий сабаби жанговар тажриба ва ҳимоянинг йўқлиги билан изоҳлаган. Украина ҳарбий хизматчиларининг таъкидлашича, шимолий кореяликлардан қалқон сифатида фойдаланилмоқда — улар миналанган майдонлар ва зич ўқлар остида мустаҳкамланган позицияларни эгаллашга йўналтирилмоқда.
Изоҳ (0)