Украинага қарши уч йиллик кенг кўламли урушдан сўнг, Россия 2022 йилгача бўлган даврга нисбатан анча заифлашди. Бу ҳақда НАТОнинг юқори лавозимли амалдорига таяниб, Deutsche Welle хабар берди.
У Россия армиясининг Украинага қарши урушдаги одам йўқотишларини ҳайратланарли деб атади. НАТО ҳисоб-китобларига кўра, сўнгги ойларда Россия ҳар куни 1000-1500 кишини йўқотмоқда.
“Бу рақамларни арзимас деб ҳисоблаш учун инсон ҳаётига даҳшатли даражада эътиборсиз бўлиш керак. Кўпчилигимиз бугунги Россиянинг ёшлар ҳаётини беҳуда сарфлашга, ўлим ва вайронагарчилик келтиришга тайёрлигидан ташвишдамиз. Буни кўриш ўта оғриқли”, деди альянс ходими.
НАТО вакилининг сўзларига кўра, Россия президенти Владимир Путин ҳарбий қудратга эътибор қаратиб, бошқа соҳаларни бутунлай эътибордан четда қолдирмоқда ва уларни “қурбон қилмоқда”. Аммо шунда ҳам у Украинадаги ҳарбий мақсадларига эриша олмади, эришган натижалари эса унинг иттифоқчилари, жумладан Шимолий Корея ва Эрон ёрдами туфайли бўлди.
“Россия ҳар куни шунча одамни қурбон қила олиши ва ҳарбий ҳаракатларни шу даражада давом эттира олишига ишонмайман. Бунинг вақт чегараси бор, деди амалдор.
Унинг фикрича, гап бир неча йил ҳақида кетмоқда, чунки Россиядаги иқтисодиёт ва сиёсий тизимнинг бундай юкни узоқроқ кўтара олишига шубҳа мавжуд.
“Украинанинг НАТОга аъзолиги — энг фойдали ва хавфсиз вариант”
НАТОнинг юқори мартабали амалдори Украина ҳақида гапирар экан, унинг Ғарбдаги қўллаб-қувватлаши сусаймагани ҳақида таъкидлади. Бундан ташқари, Украинага ёрдам кўрсатиш Шимолий Атлантика альянсининг асосий сиёсий йўналишларидан бири ҳисобланади.
Агар биз Украинани қўллаб-қувватлашнинг бу даражасини сақлаб қола олсак, агар НАТО ягона бўлиб қолса, унда биз Россия реакциясини кўрамиз, деди у.
Бошқа манбалар каби, у ҳам альянсда АҚШнинг янги администрациясининг бу борадаги позицияси шаклланиши кутилаётганини ва Америка томони иттифоқчиларни тинглашга тайёр эканини қайд этди.
Амалдорнинг тушунтиришича, НАТО “Вашингтон билан альянснинг 32 аъзосидан бири, гарчи энг йириги бўлса-да, умумий позицияга келиш ва келгуси сиёсатни шакллантириш учун ишлайди”.
2024 йилги Вашингтон саммити қарорида кўрсатилган Украинанинг келажакдаги аъзолигига келсак, НАТО ҳозирча аниқ муддатларни муҳокама қилмаяпти. Шунга қарамай, улар “Украинанинг НАТОга аъзо бўлиши келажак учун энг иқтисодий самарали ва хавфсиз вариант” эканлигига ишонади.
Изоҳ (0)