Россия Украинага қарши урушда фойдаланаётган Шимолий Корея баллистик ракеталари 2024 йил декабрь ойи охиридан бошлаб анча аниқроқ ҳаракатлана бошлади. Бу ҳақда Reuters Украинанинг икки юқори мартабали манбасига таяниб ёзмоқда.
Уларнинг сўзларига кўра, сўнгги бир неча ҳафта ичида Украина бўйлаб отилган снарядлар мўлжалланган нишонга кўпи билан 50-100 метрга оғиб зарба бера бошлаган, илгари бу кўрсаткич 1-3 км ни ташкил қилган.
Бу КХДР ўз ракета технологияларини синовдан ўтказиш учун жанг майдонидан муваффақиятли фойдаланаётганидан далолат беради, дейди Reutersънинг армия ва Украина ҳукуматидаги суҳбатдошлари анонимлик шарти билан.
Сеулдаги Асан сиёсий тадқиқотлар институти қурол-яроғ бўйича эксперти Ян Укнинг агентликка айтишича, унинг Украинадаги манбалари ҳам КХДР Россияга топширган сўнгги ракеталар партиясининг хусусиятлари яхшиланганини тасдиқламоқда.
Улар ракеталарни ишлаб чиқаргани ва буюртмачилар ҳисобланмиш Россия армиясидан фикр-мулоҳазалар олгани сабабли уларда янада ишончли ракеталарни яратиш учун зарур бўлган тажриба пайдо бўлади, дея тушунтирди эксперт.
Ян Укнинг огоҳлантиришича, Шимолий Корея ракеталарининг бундай такомиллаштирилиши “хавотирли оқибатларга олиб келади”, чунки у Жанубий Корея, Япония ва АҚШ хавфсизлигига таҳдид солади. Бундан ташқари, унинг сўзларига кўра, КХДР ўзининг модернизация қилинган қуролларини “қодир бўлмаган давлатлар ёки қуролли гуруҳларга сотиши мумкин.
Бу минтақа ва дунёда барқарорликка жиддий таъсир кўрсатиши мумкин, дея қўшимча қилди у.
Reuters суҳбатдошларига кўра, Шимолий Корея ўз ракеталарининг кўрсаткичларини яхшилаш учун айнан қандай ўзгаришлар киритгани номаълум. Агентлик манбаларидан бирининг таъкидлашича, ҳозирча қолдиқлар экспертизаси Шимолий Корея ракеталарининг дизайнида ҳеч қандай ўзгаришларни аниқлашга имкон бермаган, бироқ улар янада такомиллашган навигация тизимлари ёки манёвр қилишни осонлаштирадиган рул механизми билан жиҳозланган бўлиши мумкин.
Россия 2023 йил охирида Шимолий Кореянинг Украинага қарши К-23, К-23А ва К-24 қисқа масофали баллистик ракеталарини учиришни бошлади ва ўшандан бери 100 га яқин снаряд учирди, деди ҳарбий манба.
Аниқланишича, Шимолий Корея баллистик ракеталари Россия ракета зарбаларининг кичик бир қисмини ташкил этса-да, улар оғирлиги бир тоннагача бўлган йирик каллакни олиб юради ва 800 км гача масофага уча олади. Россиянинг шунга ўхшаш Искандер-М ракетаси камроқ фойдали юкни кўтаради ва 500 км масофани босиб ўтади.
Изоҳ (0)