Шимолий Корея марказий ахборот агентлиги (KCNA) НАТО ва Европа Иттифоқини танқид қилган баёнот эълон қилди.
Унда айтилишича, Шимолий Кореянинг ядро қуроли ҳеч қачон “савдолашиш объекти” бўлмайди, у жанговар фойдаланиш учун мўлжалланган.
“Бизнинг ядро қуролларимиз кимнингдир “тан олишини” қозониш учун мўлжалланган “реклама” эмас. Шунингдек, арзимас чақага алмаштириб бўладиган “савдо-сотиқ объекти” эмас. Мамлакатимиз ядровий кучлари доимий жанговар фойдаланиш учун мўлжалланган”, — дейилади баёнотда.
Агентлик Корея ярим ороли яқинида АҚШ иштирокида бўлиб ўтган ҳарбий машғулотларни ҳам эслатиб ўтди.
Шимолий Корея Яқин Шарқ ва Украинадаги можароларда Ғарб давлатларини ҳам айблади.
“Барча фактлар ўзларини “тинчлик қўриқчилари” деб атаган НАТО ва ЕИ асосан сафсата сотаётганини, уларнинг даъволари дунёдаги хавфсизликга ҳеч қандай алоқаси йўқлигини кўрсатади”, дейилади баёнотда.
Аввалроқ АҚШ президенти Дональд Трамп Япония бош вазири Сигеру Исиба билан музокара ўтказган эди. Қўшма баёнотда улар Вашингтон ва Токио ўртасида хавфсизлик бўйича мустаҳкамланган ҳамкорликни Ҳинд-Тинч океани минтақасида тинчлик ва барқарорликни таъминлашнинг асоси сифатида таърифладилар.
Изоҳ (0)