АҚШнинг сайланган президенти Дональд Трамп жамоаси муносабатларни “юмшатиш” ва қуролли можаро хавфини бартараф этиш мақсадида КХДР раҳбари Ким Чен Ин билан тўғридан тўғри музокара ўтказишни муҳокама қилмоқда. Бу ҳақда манбаларга таяниб, Reuters хабар берди.
Манбаларга кўра, янги дипломатик саъй-ҳаракатлар қандай натижа бериши ҳозирча номаълум. Бироқ Трампнинг асосий мақсади АҚШ ва Шимолий Корея ўртасидаги асосий алоқаларни тиклашдан иборат. Сайланган президент жамоаси ҳозирча сиёсий мақсадларни муҳокама қилмаяпти. Чунки Яқин Шарқ ва Украинадаги долзарб муаммолар туфайли Пхеньян билан муносабатлар иккинчи даражали бўлиб қолиши мумкин.
Сайловолди кампанияси давомида у президентлик даврида Шимолий Корея раҳбари билан “тил топишгани” ва Пхеньяннинг ракета синовларини вақтинча тўхтатишга эришганини таъкидлаганди.
Ядро қуроллари кўп бўлган киши билан чиқишиш ёқимли. Тўғрисини айтсам, у мени соғинаётган бўлса керак, деган ўшанда Трамп.
Ўтган ҳафта у ўзининг миллий хавфсизлик бўйича маслаҳатчиси ўринбосари лавозимига Алекс Вонгни тайинлашни таклиф этди. Трампнинг биринчи президентлик муддатида Вонг АҚШнинг Шимолий Корея бўйича махсус вакили ўринбосари сифатида фаолият юритган ва шу лавозимда Ким Чен Ин билан музокараларни ташкиллаштирган.
Трампнинг ташаббусига Ким қандай муносабат билдириши номаълум, чунки у АҚШ президенти Жо Байденнинг дастлабки шартларсиз музокаралар бошлаш таклифларини рад этган.
Сўнгги пайтларда КХДР Россия билан яқинлашди. Бу эса Пхеньянга ўзининг ракета захирасини кенгайтириш имконини берган бўлиши мумкин. Шу билан бирга, Шимолий Корея давлат оммавий ахборот воситалари ҳозиргача Трампнинг қайта сайланиши ҳақида очиқ хабар бермаган. Ким эса шу ойда АҚШни Корея яриморолида вазиятни кескинлаштириб, ядро уруши хавфини ошираётганликда айблади.
Изоҳ (0)