Россия 2024 йил мартидан бери Шимолий Кореяга 1 миллион баррелдан ортиқ нефть жўнатди. Бу ҳақда Open Source Centre (ОSC) тадқиқот марказининг сунъий йўлдош суратлари асосидаги ҳисоб-китобларига таяниб, BBC хабар берди.
Таҳлилчиларга кўра, сўнгги саккиз ой ичида Шимолий Кореянинг ўндан ортиқ танкерлари Узоқ Шарқдаги Россия нефть терминали ва Шимолий Корея портлари ўртасида 43 марта қатновни амалга оширган. Сунъий йўлдошдан олинган суратларга кўра, ушбу танкерлар Россияга бўш кетган ва юкланган ҳолда қайтиб келган.
ОSC томонидан ҳужжатлаштирилган биринчи қатнов Шимолий Корея ўқ-дорилари Россияга жўнатилгани ҳақидаги биринчи хабарлардан етти ой ўтиб, 7 март куни амалга оширилган. Охирги қатнов 5 ноябрь куни қайд этилган, ўшанда Шимолий Корея қўшинларининг Курск вилоятига жўнатилгани ҳақида маълум бўлган эди.
КХДР барқарорлигининг ошиши
“Бу доимий нефть оқими Шимолий Кореяга санкциялар жорий этилганидан бери кузатилмаган барқарорлик даражасини бермоқда”, деди Очиқ манбалар марказининг катта таҳлилчиси Жо Бёрн.
Ядро қуролини ишлаб чиққани учун КХДРга нисбатан халқаро санкциялар жорий этилган. Мамлакатга йилига 500 минг баррелдан ортиқ нефть сотиб олиш тақиқланган.
Аввалроқ Британиянинг The Times газетаси Шимолий Корея Россияга йилига 3 миллионга яқин снаряд етказиб беришини, бу Россия армияси Украинага қарши урушда ишлатадиган ўқ-дориларнинг ярмини ташкил этиши ҳақида хабар берган эди.
Россиядаги Шимолий Корея аскарлари
Октябрь ойида Украина президенти Владимир Зеленский Шимолий Корея ўз аскарларини Россияга ёрдам бериш учун юборганини айтган эди. Кейинчалик бу маълумотни Жанубий Корея разведкаси ва Пентагон тасдиқлаган. Жанубий Корея разведкаси Москва Пхеньянга ҳар бир ҳарбий хизматчи учун икки минг доллар тўлаётгани, бу оддий КХДР фуқаросининг 83 йиллик маошига тенг эканлигини маълум қилган.
Ноябрь ойида АҚШ давлат департаменти Россияга ёрдам бериш учун юборилган шимолий кореялик аскарларнинг аксарияти аллақачон Курск вилоятидаги жангларда қатнашаётганини айтган.
Июнь ойида Россия президенти Владимир Путин Шимолий Кореяга ташриф буюриб, Ким Чен Ин билан кенг қамровли стратегик шериклик шартномасини имзолаган эди. Ушбу битимга кўра, томонлардан бирига ҳужум қилинган тақдирда иккинчиси барча мавжуд воситалар билан ҳарбий ёрдам кўрсатиш мажбуриятини олади.
Изоҳ (0)