Швейцария Ташқи ишлар вазирлиги илк марта Украина Қуролли кучлари сафида жанг қилган ўз фуқаросининг ҳалок бўлганини тасдиқлади. Бу ҳақда Швейцария радио ва телевидениеси (SRF) портали ташқи сиёсат идорасининг матбуот хизматига асосланиб хабар берди.
Швейцариянинг Киевдаги элчихонасига йил бошида Украина ҳарбий қўмондонлиги томонидан жанг ҳаракатлари натижасида бир нафар швейсариялик ҳалок бўлгани ҳақида маълумот берилган эди, дейилади хабарда.
Ёлланма аскарнинг ўлими ҳолатлари ҳамда унинг бўлинмаси жойлашган жой тўғрисидаги маълумотлар келтирилмаган. Таъкидланишича, мамлакат ТИВ марҳумнинг қариндошлари билан алоқада.
Швейцариянинг амалдаги қонунчилиги мамлакат фуқароларига хориждаги жанг ҳаракатларида ёлланма аскар сифатида иштирок этишни тақиқлайди. Мамлакатда бундай аскарларни суд таъқиби ва уч йилгача озодликдан маҳрум қилиш жазоси кутмоқда.
SRF’га кўра, Украинадаги швейсариялик ёлланма аскарларнинг умумий сони номаълум, бироқ мамлакатда хориждаги ҳарбий хизмат бўйича 13 та жиноий иш текширилмоқда.
Бундай ҳолатлар Россия фронтида ҳам кузатилиб, аввалроқ Москва томонида Украинага қарши жанг қилаётган шимолий кореялик аскарлар ҳалок бўлгани ҳақида бир неча бор хабар берилган эди.
Украина армияси бундай йўқотишларни бир қатор сабаблар билан изоҳламоқда. Жумладан, Шимолий Корея аскарлари “Иккинчи жаҳон уруши давридаги каби” пиёда ҳужум қилган ва Украина дронлари ҳамда артиллерияси учун осон нишон бўлган. Улар одатда нишонга олинсалар ҳам, ҳужумни давом эттирган.
Бундан ташқари, асирга тушмаслик учун Шимолий Корея аскарлари ўзларини гранаталар билан портлатган. Шунингдек, КХДР аскарлари тил билан боғлиқ муаммо туфайли Россия қўшинлари билан контактга яхши киришмаган. Ҳатто тасодифан Россия позицияларига ҳужум қилган.
Катта йўқотишларга қарамай, Пхеньян яқин икки ой ичида Россияга ҳарбийларнинг янги гуруҳини юбориши мумкин. Шимолий Корея Москвани қўллаб-қувватлаш учун 100 минггача аскар беришга тайёрлигини маълум қилгани айтилмоқда. Украина разведкаси раҳбари Кирилл Буданов КХДРдан қўшимча куч келиши мумкинлигини тасдиқлаган. Аммо Киевда Шимолий Кореянинг кўп сонли янги жанговар қисмлари пайдо бўлишини кутмаётганини айтган.
Изоҳ (0)