Ўзбекистонлик олимлар Бухоро, Навоий вилоятлари ва Қорақалпоғистон Республикаси ҳудудида фан учун янги бўлган қўнғиз турини кашф этди. Бу ҳақда “Дарё”га кашфиёт муаллифларидан бири — Хоразм Маъмун академияси докторанти Норбек Бекчанов хабар берди.
Таъкидланишича, муаллиф россиялик устози, энтомолог олим Максим Набоженко билан биргаликда бир неча йиллардан буён Ўзбекистон энтомофаунасини тадқиқ қилиб келмоқда. Изланишлар давомида Қорақалпоғистон Республикаси ҳамда Бухоро ва Навоий вилоятлари ҳудудидан иккита фан учун номаълум бўлган қўнғиз турини аниқлашга муваффақ бўлган.
Аниқланган янги турларга Microdera uzbekistanica ҳамда Microdera abdullohi деб ном берилган.
Бу турлар Tenebrionidae оиласига мансуб бўлиб, M.uzbekistanica тури Кулжуктоғ ҳудудида (Бухоро ва Навоий вилоятлари) M.abdullohi тури эса Султон-Увайс тоғи ҳудудида (Қорақалпоғистон) тарқалган. Асосан тунда фаоллашадиган бу турлар қуруқ муҳит учун жуда мослашган эндемиклардир. Мазкур уруғ турлари бутун дунё бўйича 88 тани ташкил қилиб, бу кўрсатгич энди яна 2 тага кўпайди, дейди Норбек Бекчанов.
Чуқур халқаро экспертизадан ўтгандан сўнг кашфиёт ҳақида машҳур халқаро илмий Zootaxа журналида мақола эълон қилинган.
Қўнғизлар Ер шарининг деярли барча ҳудудларида учрайдиган ҳашаротларнинг энг кўп сонли гуруҳи бўлиб, экотизимда энг муҳим мавжудотлар саналади. Улар орасида экинларга зарар етказадиганлари ҳам, табиатга фойда келтирадиган турлари ҳам мавжуд. Бундан ташқари, ҳали фанга номаълум бўлган ноёб ва йўқ бўлиб кетиш хавфи остидаги муҳофаза қилинадиган турлар ҳам бор.
Аввалроқ Фарғона давлат университети ихтиолог олимлари Фарғона водийси ҳамда Ўзбекистоннинг бошқа ҳудудларидаги балиқларнинг тур таркиби, биологияси ва экологиясига оид қатор тадқиқотларни олиб бориши жараёнида фан учун янги бўлган ялангбалиқ турини кашф этишгани хабар қилинганди.
Изоҳ (0)