Палеонтологлар бир пайтлар ҳозирги Перу ҳудудининг бир қисмини қоплаган океанда яшаган, замонавий китларнинг қадимий аждоди бўлган ёввойи денгиз йиртқич ҳайвонининг бош суягини топди.
Тахминан 36 миллион йил давомида яхши сақланиб келган бош суяги Перу жанубидаги Оккаже чўлида қоялар орасидан, қатор узун, ўткир тишлари билан бузилмаган ҳолда қазиб олинган.
Олимларнинг фикрига кўра, бу қадимги сутемизувчи базилозавр бўлиб, у сувда яшовчи китлар оиласига мансуб, унинг замонавий авлодлари китлар, дельфинлар ва денгиз чўчқаларини ўз ичига олади.
Базилозавр «қирол калтакесак» деган маънони англатади, гарчи ҳайвон судралувчи бўлмаса-да, унинг узун танаси баҳайбат илон каби ҳаракатланган бўлиши мумкин.
Йиртқичнинг узунлиги тахминан 12 метр ёки тўрт қаватли бинонинг баландлигига тенг бўлган.
«Бу кашфиёт жуда муҳим, чунки бош суяги мукаммал сақланиб қолган», — деди Перунинг Сан-Маркос миллий университети палеонтология бўлими бошлиғи Родолф Салас. У университет музейида намойиш этилган бош суяги базилозаврнинг янги турига тегишли бўлиши мумкинлигини қўшимча қилди.
«Бу ҳайвонлар ўз даврининг энг катта йиртқичлари бўлган», — деди Салас.
Олимларнинг фикрича, биринчи кицимонлар тахминан 55 миллион йил олдин қуруқликда яшаган сутемизувчиларнинг авлоди бўлган.
Саласнинг таъкидлашича, қадимги базилозавр ўлганида, унинг бош суяги денгиз тубига тушиб кетган ва у ерда кўмилган ҳолда яхши сақланиб қолган.
Изоҳ (0)