Саудия Арабистонининг Буюк Британиядаги элчиси, шаҳзода Холид бин Бандар Ал-Сауднинг таъкидлашича, мамлакат ҳукумати 2034 йилги футбол бўйича Жаҳон чемпионати вақтида алкоголли ичимликлар сотилишига рухсат бериш учун қонунларни ўзгартириш ниятида эмас ва ҳеч қандай истисно қилинмайди.
-c3a4SIjD.jpg)
2023 йил декабрь ойида Халқаро футбол федерацияси (FIFA) конгресси Саудия Арабистонини 2034 йилги Жаҳон чемпионати мезбони сифатида тасдиқлади. Кейинчалик FIFA вакиллари мусобақа ташкилотчилари билан стадионларда пиво сотиш бўйича маҳаллий қонунчиликка зид келадиган музокаралар ўтказиш режалари йўқлигини билдирган эди.
Шаҳзода Холид бин Бандар Ал-Сауд турнирга келадиган меҳмонлар Форс кўрфази давлатининг маданиятига ҳурмат билан ёндашиши кераклиги ва мусобақа давомида, ҳатто меҳмонхоналар ичида ҳам, алкоголь сотилмаслигини таъкидлади.
“Биз алкоголь истеъмол қилишга рухсат бермаймиз. Спиртли ичимлик ичмасдан ҳам ажойиб вақт ўтказиш мумкин. Агар турнирдан кейин ичишни хоҳласангиз, марҳамат, лекин ҳозирча бизда алкоголь йўқ. Мамлакатимизнинг об-ҳавоси қуруқ. Бизнинг юртимиз ҳам бу борада ‘қуруқ’ ” дея шаҳзода Бандар Ал-Сауднинг сўзларини келтиради Британиянинг LBC радиостанцияси.
Саудия Арабистонида алкоголь сотилишининг тақиқланиши мухлисларга қанчалик қулай бўлиши ҳақидаги саволга элчи қуйидагича жавоб берди:
“Ҳар бир мамлакатнинг ўз маданияти бор. Биз меҳмонларни қабул қилишга тайёрмиз, аммо ўз маданиятимизни бошқалар учун ўзгартиришни истамаймиз”.
У шунингдек ҳазил билан “Чиндан ҳам, спиртли ичимликларсиз яшай олмайсизми?” дея қўшимча қилди.
Инсон ҳуқуқлари ташкилотлари Саудия Арабистонида Жаҳон чемпионати ўтказилиши бўйича хавотир билдирган. Аmnesty International турнир мезбонлиги берилишидан олдин мигрант ишчиларнинг эксплуатация қилиниши ва кўпчилиги ҳалок бўлиши мумкинлигини таъкидлаган эди.
Шунингдек, Саудия Арабистонида LGBТQIА+ жамоаси вакилларига нисбатан дискриминация бўлиши мумкинлиги ҳам асосий ташвишлардан бири сифатида кўрилмоқда. Мамлакат қонунчилигига кўра, бир жинсли шахслар ўртасидаги жинсий муносабат исботланса, ҳатто ўлим жазосига ҳукм қилиниши мумкин.
Шу сабабли, Жаҳон чемпионатига LGBТ жамоасига мансуб мухлислар келиши мумкинми, деган саволга элчи шундай жавоб берди:
“Бу фақат Саудия Арабистонининг мусобақаси эмас, балки жаҳон даражасидаги турнирдир. Биз имкон қадар, келишни истаганларнинг барчасини кутиб олишга тайёрмиз”.
2022 йилда Қатарда ўтказилган Жаҳон чемпионати олдидан алкоголь сотилиши масаласи кўплаб муҳокамаларга сабаб бўлганди. FIFA дастлаб стадионларда пиво сотишга рухсат берган эди, лекин турнир бошланишига икки кун қолганида, якуний музокаралар натижасида бу қарор бекор қилинди. Натижада мухлислар фақат меҳмонхоналар ва махсус фан-зоналарда алкоголли ичимликлар харид қилиш имкониятига эга бўлишди. FIFA пиво ишлаб чиқарувчи компанияга тахминан 40 миллион фунт стерлинг миқдорида компенсация тўлашга мажбур бўлганди.
Изоҳ (0)