Бош прокуратура 140 та олийгоҳда 57 та хорижий давлатдан келган 13,2 минг нафар талаба таҳсил олаётганини маълум қилди.
Хабарга кўра, давлат раҳбари томонидан жорий йилнинг 16 январь куни ўтказилган йиғилишда берилган топшириққа мувофиқ бош прокурорнинг биринчи ўринбосари ҳамда олий таълим, фан ва инновациялар вазири раҳбарлигида олий таълим соҳасига хорижий инвестицияларни кенг жалб этиш ва экспорт салоҳиятини ошириш бўйича видеоселектор йиғилиши бўлиб ўтди.
Унда айтилишича, олий таълим тизимида сўнгги 5 йилда 125 млн АҚШ доллар хорижий инвестициялар ўзлаштирилиб, 65 та хусусий олийгоҳлар ташкил этилган. Бугунги кунга келиб 1,5 млн нафар фуқарога олий маълумотли бўлиш имконияти яратилган, олий таълимга қамров даражаси 2,1 баробарга ўсган. Мамлакатдаги 140 та олийгоҳда 57 та хорижий давлатдан келган 13,2 минг нафар талаба ҳам таҳсил олмоқда. Сўнгги 5 йилда бу кўрсаткич 3 баробарга ошган.
Хусусан, 2024 йилнинг январь-май ойларида жами 7,4 минг нафар чет эл фуқаролари ўқиш мақсадида Ўзбекистонга ташриф буюрган эди. Бу кўрсаткич ўтган йилнинг мос даври билан солиштирилганда 2,9 минг нафарга ёки 65,2 фоизга ошган.
Ўтказилган тадбирда бу борадаги кўрсаткичлар мавжуд имкониятларни тўлиқ намоён этмаётгани, соҳани янада ривожлантиришга қаратилган тадбирларни жадаллаштириш зарурлиги, бунда тизимдаги йирик олийгоҳларнинг ҳар бири 20-30 млн АҚШ доллар хорижий инвестиция ўзлаштириши ва 10 млн АҚШ доллар миқдорда экспортни амалга ошириш чораларини кўриши лозимлиги таъкидланди.
Йиғилиш якуни бўйича олий таълим соҳасида инвестиция ва экспортни ривожлантириш бўйича тегишли чора-тадбирлар белгиланиб, ижроси алоҳида назоратга олинди.
Аввалроқ хорижда ўқиган ўзбекистонлик талабалар ватанга қайтганида муваффақиятли карьера қилишига ёрдам берилиши айтилганди. Ҳозирги вақтда дунёдаги топ-олийгоҳларда 1,5 мингдан зиёд ўзбекистонлик талаба таҳсил олмоқда. Президент буни Ўзбекистон учун тарихда кузатилмаган воқелик деб атади.
Изоҳ (0)