АҚШ президенти Дональд Трамп ўзининг Truth Social ижтимоий тармоғида Манҳеттен ҳудудига кириш учун белгиланган тўловни бекор қилишини маълум қилди. Аввалроқ тирбандликнинг олдини олиш учун Нью Йорк марказига автомобилда кириш пулли қилинган эди.
“Тирбандликнинг олдини олиш учун белгиланган нархлар бекор бўлди. Манҳеттен ва бутун Нью Йорк қутқарилди. Яшасин қирол!”, деб ёзди Трамп.
АҚШ транспорт вазири Шон Даффи Нью Йорк губернатори Кети Хокулга мактуб йўллаб, Трамп қарорини бекор қилишни сўради. “Бу қарор ишчилар синфи ва кичик бизнес эгаларига зарба”, деб атади Даффи.
Шундан сўнг Оқ уйнинг Instagram ва Х (собиқ Twitter) аккаунтларида Тиме журналини эслатувчи, аммо Трамп деб номланган журнал муқовасида Трампнинг тож кийган иллюстрацияси жойлаштирилди.
Федерал ҳукуматнинг қарори маҳаллий ҳокимият органларининг кескин танқидига сабаб бўлди. Губернатор Хокул Трамп маъмуриятининг ҳаракатларини “мантиқсиз” деб атади ва дастурни сақлаб қолиш учун судда курашишга ваъда берди. Транспорт вазирлиги буйруқни бекор қилиш учун федерал судга мурожаат қилди.
“Биз қирол томонидан эмас, қонунлар билан бошқариладиган давлатмиз. Транспорт вазирлиги ушбу муҳим дастурни сақлаб қолиш учун Нью Йоркнинг жанубий округида судга мурожаат қилди. Судда кўришгунча”, деди Хокул Трампга қарата.
Изоҳ (0)