14 февраль куни нафас йўллари инфекцияси билан касалхонага ётқизилган Рим папаси Францискда икки томонлама пневмония аниқланди, унинг аҳволи оғир. Бу ҳақда Ватикан матбуот хизматига таяниб, ABC News хабар берди.
Кўкрак қафасининг такрорий компьютер томографияси икки томонлама пневмония бошланишини кўрсатди. Ҳозирда Рим папаси “яхши кайфиятда экани айтилмоқда.
Бронхоэктазлар ва астматик бронхит фонида юзага келган ва кортизон антибиотик терапиясини талаб қилган полимикроб инфекция терапевтик даволашни янада мураккаблаштиради, дейилади хабарда.
Шу билан бирга, Politico манбалари Франциск кучли оғриқдан азият чекаётгани ва “бу сафар бардош бера олмаслигига” ишонч билдирмоқда. Папа ўлим хавфи борлигини айтмагунларича касалхонага ётқизилишга қаршилик кўрсатган.
Энди понтифик ўз меросини ҳимоя қилишга ҳаракат қилмоқда, асосий ташаббусларни якунлаб, унга хайрихоҳ бўлган одамларни асосий лавозимларга тайинламоқда. Франциск черковни янада инклюзив қилишга ҳаракат қилган. Унинг яқинда АҚШнинг янги маъмурияти сиёсатини қоралаши эса тахт учун бўладиган жуда сиёсийлашган кураш эҳтимолини янада кучайтирди.
Рим папасининг АҚШ вице-президенти билан можароси
АҚШнинг янги вице-президенти Жей Ди Венс яқинда берган интервьюларидан бирида ноқонуний муҳожирларни депортация қилиш католик нуқтаи назаридан оқланганини айтганди.
Бунга жавобан Папа Франциск Америка епископларига президент Дональд Трамп маъмуриятининг ноқонуний муҳожирларни оммавий равишда депортация қилиш режаларини қораловчи мактуб йўллади. У муҳожирлар ва қочқинларни камситувчи ривоятларга берилмасликка чақирди.
Рим папаси ўпка инфекцияларига мойил
У ёшлигида плеврит билан касалланган ва ўпкасининг бир қисми олиб ташланган. 18 февраль куни Ватикан вакили понтифик сунъий нафас олдириш аппаратига уланмаганини, у мустақил нафас олаётганини маълум қилди. Сўнгги йилларда 88 ёшли Рим папаси соғлиғи билан боғлиқ муаммолар, жумладан, узоқ давом этган бронхит хуружларидан азият чекаётган эди. 2023 йилнинг ёзида унда чуррани олиб ташлаш бўйича жарроҳлик амалиёти ўтказилган.
Изоҳ (0)