АҚШ мудофаа вазири Пит Хегсет мудофаа бюджетини кейинги беш йил ичида ҳар йили 8 фоизга ёки жами 40 фоизга қисқартириш режасини ишлаб чиқишни буюрди. Бу ҳақда Washington Post хабар берди.
Харажатларни қисқартириш режаси 24 февралгача тақдим этилиши керак. Президент Дональд Трамп маъмурияти қисқартирилмайдиган 17 та йўналишни белгилаб берган. Бунга АҚШнинг жанубий чегарасини ҳимоя қилиш операциялари, ядровий арсенал ва ракетага қарши мудофаа тизимларини модернизация қилиш, камикадзе дронлари, сув ости кемалари ва ўқ-дориларни сотиб олиш киради.
Украинани Россия билан урушда қўллаб-қувватлашда муҳим рол ўйнайдиган Европа қўмондонлиги, Яқин Шарқдаги операцияларни бошқарадиган Марказий қўмондонлик ва қитъадаги бир неча минг америкалик аскарларни бошқарадиган Африка қўмондонлиги учун жорий молиялаштириш даражасини сақлаб қолиш ҳақида гапирилмаган.
АҚШ мудофаа бюджети 2025 йилда қарийб 850 миллиард долларни ташкил этади. Хегсет режа амалга ошса, бу Пентагон учун 2013 йилдан бери энг йирик харажатларни қисқартириш бўлишини айтмоқда. Пентагоннинг юқори мартабали амалдорлари яқин йилда АҚШ бюджетида 50 миллиард доллар тежалган маблағ қолишини прогноз қилган. Бу маблағлар Исроилникига “Темир гумбаз” мудофаа тизимини яратиш учун сарфланиши мумкин.
Трамп Исроилдаги каби “Темир гумбаз” яратишни буюрди
“Қалқон”ни ишлаб чиқиш Трампнинг сайловолди ваъдаларидан бири эди. Мудофаа тизимларини тўлиқ АҚШда ишлаб чиқариш режалаштирилган. Бунда етакчи ролни темир рудаси қазиб олишда пешқадам бўлган Миннесота штати ўйнаши мумкин.
Трамп АҚШнинг “баллистик, қанотли ва гипертовушли ракеталар” томонидан “ҳалокатли таҳдид”га дуч келаётганини айтганди. Бироқ, АҚШ (3 800 000 квадрат мил) каби катта мамлакатни ҳимоя қилишга қодир бўлган ҳар қандай қалқон, майдони 8630 квадрат мил бўлган Исроил тизимидан анча каттароқ бўлиши аниқ. Кўплаб ҳарбий экспертлар бундай миқёсдаги “Темир гумбаз” самарасиз бўлиши ва жуда қимматга тушиши ҳақида огоҳлантирмоқда.
Изоҳ (0)