АҚШ Ички хавфсизлик вазирлиги (ИХВ) муҳожирларни Америка иммиграция қонунчилигини бузишдан огоҳлантириш мақсадида бир неча миллион долларлик реклама кампанияси бошланганини эълон қилди.
ИХВ сайтида кўрсатилишича, бир қатор видео эълонлар радио, телевидение ва рақамли форматда кўплаб мамлакатлар ҳамда минтақаларда турли тилларда эфирга узатилади.
Идора ўзининг YouTube’даги каналида иккита видеоролик эълон қилди: биринчиси АҚШ чегарасини аллақачон кесиб ўтиб, мамлакатда ноқонуний бўлиб турган одамларга қаратилган бўлса, иккинчиси эса мамлакат ташқарисидаги одамларни бундан огоҳлантиради.
Ички хавфсизлик вазири Кристи Ноэм видеомурожаатида президент Дональд Трампга “чегаралар хавфсизлигини таъминлагани, жиноят содир этган ноқонуний муҳожирларни мамлакатдан чиқариб юборгани ва Американи биринчи ўринга қўйгани учун” миннатдорлик билдирган.
Президент Трамп агар сиз бу ерда ноқонуний бўлсангиз, биз сизни топишимиз ва депортация қилишимиз ҳақида маълум қилган. Сиз ҳеч қачон АҚШга қайтмайсиз, дейилади ИХВнинг биринчи видеосида.
Иккинчи видеода Ноэм АҚШга ноқонуний кириш имкониятини кўриб чиқаётган одамларни огоҳлантириб, мамлакатга келиб, Америка қонунчилигини бузганларни таъқиб қилишга ваъда берган.
Сиёсатчи ўз мурожаатида, шунингдек, “узоқ вақт давомида чегарани кенг очиб қўйган заиф сиёсатчиларни” айблаб, бу гиёҳванд моддалар савдоси, жиноятчиликнинг ўсиши ва одам савдоси билан боғлиқ муаммоларга сабаб бўлганини айтган.
Агар ҳозир кетсангиз, келажакда қайтиш, эркинлигимиздан завқланиш ва Америка орзусини рўёбга чиқариш имкониятига эга бўлишингиз мумкин. Америка ўз қонунларини ҳурмат қилганларни олқишлайди, дейилади мурожаатда.
Реклама кампанияси янги маъмуриятнинг миграция сиёсатини кучайтириш бўйича кенг кўламли саъй-ҳаракатларининг бир қисмидир. Хусусан, январь ойи охирида президент Дональд Трамп Венесуэладан келган муҳожир томонидан ўлдирилган 22 ёшли талаба қиз хотирасига аталган Лейкен Райли қонунини имзолади. Қонун ИИВдан ўғирлик ва зўравонлик жиноятларида гумон қилинган ноқонуний муҳожирларни, гарчи уларга расман айблов қўйилмаган бўлса ҳам, ҳибсга олишни талаб қилади.
Шунингдек, аввалроқ президент Гуантанамодаги Америка ҳарбий базасида АҚШда ноқонуний бўлиб турган муҳожирларни сақлаш учун марказ очишни буюрганди. Марказ 30 минггача кишини қабул қила олади.
Изоҳ (0)