Россия президенти Владимир Путин Курск вилояти губернатори Алексей Смирновни август ойида Украина армиясининг бостириб киришидан кейин юзага келган бошқарувдаги “хаос” туфайли истеъфога чиқарди. Бу ҳақда манбаларга таяниб, “Вёрстка” хабар берди.
Манбаларга кўра, президент администрациясида Смирнов ўрнини эгалловчи номзодни ноябрь бошида излаш бошланган, бироқ Путин губернатор вазифасини бажарувчи этиб тайинлаган Александр Хинштейн номзоди бир кун олдин келишилган.
Смирнов ҳал қила олмаган асосий муаммолар — Украина армияси томонидан эгалланган ҳудудлардан кўчирилган аҳоли норозилиги ва эътирозлари, шунингдек губернатор лавозимидан олиб ташлашга эришмаган маҳаллий ҳокимият раҳбарлари билан келишмовчиликлар эди.
Бундан ташқари, маҳаллий амалдорлар таъкидлашича, Смирновнинг истеъфога чиқишининг яна бир сабаби — Украина билан чегарада қурилган мудофаа иншоотлари бўлиб, улар “ҳал қилувчи лаҳзада ҳеч қандай фойда келтирмаган”.
Ҳозир у ерда текширувлар ва жиноий ишлар олиб борилмоқда. Эҳтимол, тафтиш натижалари ниҳоят олий раҳбариятгача етиб борган бўлиши мумкин, деди маҳаллий амалдорлардан бири.
“Вёрстка” нашрининг бошқа суҳбатдоши Смирновни қамоққа олишлари мумкинлигини тахмин қилди. Бироқ бундай ҳолатда май ойида транспорт вазири лавозимига ўтган унинг салафи Роман Старовойт ҳам жавобгарликка тортилиши лозим.
Старовойт ўз ворисининг истеъфосини Курск вилояти аҳолиси билан етарлича самарали мулоқот ўрнатмагани билан изоҳлади. У вилоят ва федерал даражада ҳудуд аҳолисини қўллаб-қувватлаш учун 160 дан ортиқ чора-тадбирлар ишлаб чиқилганини айтди.
Бу чора-тадбирларнинг қандай амалга оширилаётганини одамларга тушунтириш масаласида муаммолар юзага келди. Албатта, вазият мураккаб. Чамаси, айнан шу сабабли (муддатидан олдин истеъфога чиқариш) ҳақида қарор қабул қилинган, деб таъкидлади Старовойт.
Смирнов Курск вилояти губернатори лавозимида жами 209 кун, шу жумладан вақтинчалик вазифани бажарувчи сифатида фаолият юритди. Сиёсатшунос Михаил Виноградовнинг таъкидлашича, Путин даврида ундан камроқ муддат фақат Евгений Зиничев (Калининград вилояти, 71 кун) ва Сергей Шойгуда (Москва вилояти, 180 кун) кузатилган.
Смирнов ўрнига тайинланган Хинштейн Давлат Думасининг энг таъсирли депутатларидан бири ҳисобланади. У LGBТ тарғиботини тақиқлаш, Россияда IT-компанияларни “маҳаллийлаштириш” тўғрисидаги қонун, “номақбул” ташкилотларда рекламани ман этиш ва бошқа қатор қонунлар муаллифи бўлган. Бундан ташқари, у 2016-2018 йилларда “Росгвардия” раҳбари Виктор Золотовнинг маслаҳатчиси сифатида фаолият юритган. Ҳозиргача Давлат думасида ушбу куч тузилмасининг манфаатларини ҳимоя қилувчи шахс сифатида қаралади.
Украина армиясининг Курскка ҳужуми
Курск вилоятининг бир қисми ҳозирда Украина армияси назоратида. 6 август куни Украина қўшинлари вилоятга ҳужум бошлади ва жангларнинг биринчи ҳафтасида 1300 квадрат километрлик ҳудуд, 100 га яқин аҳоли пунктларини эгаллади. Сентябрь ойидан бери Россия қўшинлари Украина армиясини сиқиб чиқаришга фаол ҳаракат қилмоқда. Ноябрь ойи охирига келиб Украина ўз назорати остидаги ҳудуднинг қарийб 40 фоизини йўқотди. Украина ҳарбийларига кўра, уларга январь ойи охиригача, яъни АҚШ ҳокимиятга сайланган президент Дональд Трамп келгунча эгаллаб турган позицияларини сақлаб туриш буюрилган.
Изоҳ (0)