Янги Зеландия ташқи ишлар вазири Нанайя Махута россиялик сиёсатчилар ва мудофаа секторига қарши янги санкцияларни эълон қилди. Янги чеклов чоралари Россия Федерация Кенгашининг 170 нафар аъзосига ҳамда «Украина суверенитети ва ҳудудий яхлитлигига тажовуз қилишга ҳисса қўшган» олтита мудофаа корхонасига қарши қаратилган.
Янги Зеландия расмийлари шунингдек, илгари мамлакатга кириши тақиқланган 400 дан ортиқ россияликларга нисбатан санкцияларни кучайтирди.
«Бу санкциялар остига тушган шахсларнинг Янги Зеландияда фаолият юритишига тўсқинлик қилади ҳамда мамлакатимиз Россиянинг ноқонуний ҳаракатларига алоқадорлар учун молиявий бошпанага айланишининг олдини олади», — деди Махута.
Янги Зеландия февраль ойи охиридан бери Россияга қарши бир нечта санкциялар пакетини жорий қилди. Март ойи ўрталарида мамлакат Россия президенти Владимир Путин, бош вазир Михаил Мишустин, ташқи ишлар вазири Сергей Лавров, мудофаа вазири Сергей Шойгуга қарши санкциялар киритган эди. Ушбу чекловларга активларни музлатиш ва мамлакатга киришни тақиқлаш кабиларни назарда тутади.
Бундан ташқари, Веллингтон 360 дан ортиқ россиялик, жумладан, президент матбуот котиби Дмитрий Песков, «Сбербанк» бош директори Герман Греф кабиларнинг мамлакатга киришини тақиқлаган.
Апрель ойи бошида Янги Зеландия «Россиянинг стратегик тармоқлари билан чамбарчас боғлиқ бўлган маҳсулотлар» экспортини чеклаб, Россиянинг 18 та банки ва молия институтига санкция қўллаган эди.
Россия Ташқи ишлар вазирлиги Янги Зеландияни «коллектив Ғарб» ташаббуси билан бошланган «русофобик курс»да айблади. Бунга жавобан Москва мамлакатнинг 130 нафар вакили, жумладан, генерал-губернатор Синтиа Киро, бош вазир Жасинда Ардерн, унинг ўринбосари Грант Робертсон, Махут, мудофаа вазири Пини Ҳенаренинг Россияга киришини тақиқлади.
Изоҳ (0)