Украина Олий радасининг мудофаа қўмитаси раҳбари Роман Костенко АҚШ мамлакатга қурол сотишни тўхтатганини айтди. Бироқ украиналик депутат ва америкалик мулозим мазкур маълумотни рад этди. Бу ҳақда “24 Канал” хабар берди.
-3VDa1ntB.jpg)
Менда мавжуд маълумотларга кўра, сотувга чиқарилган қуролларнинг етказиб берилиши тўхтатилган. Бу қуролларни топширишга тайёр бўлган фирмалар ҳозир кутишмоқда, чунки ечим йўқ, деди у.
Костенко бундай қадамнинг сабаблари ҳозирча номаълум экани, таъминот тўлиқ тўхтамаганини айтди. Халқаро моддий-техник ёрдамни олиш ва ундан фойдаланишни назорат қилиш бўйича Олий Кенгаш комиссияси раиси Александра Устинова эса бу маълумотни рад этди.
Биз ҳозир жуда оғир даврни бошдан кечиряпмиз, оловга мой сепиш керак эмас, дея таъкидлади у.
Қурол сотиш тўхтатилгани ҳақидаги хабарларга Оқ уй ҳам муносабат билдирди. АҚШ президентининг миллий хавфсизлик бўйича маслаҳатчиси Майкл Уолтс маълумотни тасдиқламади. У ҳарбий ёрдамнинг асосий қисми тўғридан тўғри АҚШ омборларидан келаётганини айтди.
Шу билан бирга, Уолтс АҚШнинг қурол-яроғ захираларини тиклаш зарурати туфайли бу жараёнда маълум кечикишлар борлигини тан олди.
Кўпгина захираларимиз тугаб бормоқда ва бу қачон якунланиши, яна қанча ресурс талаб қилиниши ҳамда нархи қандай бўлиши ҳақида ташвишларни келтириб чиқармоқда, деди Трампнинг маслаҳатчиси.
Эслатиб ўтамиз, аввалроқ АҚШ президенти Дональд Трамп украиналик ҳамкасби Владимир Зеленский гўёки “Қўшма Штатлар Украинага ажратган маблағларнинг ярми қаердалигини билмаслигини” айтганди. Бунга жавобан Зеленский Украина ва АҚШда “бутунлай фарқли рақамлар” мавжудлигини таъкидлаган.
Бизда бутунлай бошқа рақамлар мавжуд. Бизда ҳамма нарса жуда аниқ. Уруш бизга 320 миллиард долларга тушди. 120 миллиард — бу биз, Украина халқи, солиқ тўловчилар. 200 миллиард — бу АҚШ ва Европа иттифоқдошлари. Бу қурол-яроғ тўпламлари. АҚШ бизга тахминан 67 миллиард долларлик қурол-яроғ ва 31,5 миллиард долларни бюджетга тўғридан тўғри молиявий ёрдам сифатида берган, дея аниқлик киритди Украина етакчиси.
11 февраль куни АҚШ президенти ҳарбий ёрдам эвазига Украина АҚШга ўз ҳудудида қимматбаҳо минералларни қазиб олишга рухсат беришга “деярли рози бўлганини” айтган эди. 15 февраль куни Трамп маъмурияти Украинага мамлакатнинг нодир ерости бойликларига эгалик ҳуқуқининг 50 фоизини АҚШга беришни таклиф қилгани маълум бўлди, аммо Зеленский ҳужжатни имзолашдан бош тортди. Эндиликда АҚШ Украинага фойдали қазилмалар бўйича битимнинг янги версиясини топширди.
Изоҳ (0)