Эрон ҳукумати мамлакатда авж олган жазирама туфайли электр энергияси истеъмолини камайтириш мақсадида бир қатор давлат идораларини вақтинча ёпишга қарор қилди. Бу ҳақда маҳаллий нашрларга таяниб, Al Arabiya хабар берди.
Маълумотларга кўра, эртага, 6 августдан бошлаб мамлакатдаги 31 та провинциядан камида 15 тасида давлат муассасалари тўлиқ ёпилади ёки қисқартирилган иш жадвалида фаолият юритади. Ушбу ҳудудлар орасида Ғарбий Озарбайжон, Ардабил, Ҳормозғон ва Алборз провинциялари ҳамда пойтахт Теҳрон бор.
Теҳрон губернатори Муҳаммад Содиқ Мотамедиян давлат телеканалига берган баёнотида бу қарор Энергетика вазирлигининг илтимосига биноан қабул қилинганини билдирган. У бу чоралар сув ҳамда электр соҳасида энергия сарфини бошқаришга ёрдам беришини ҳам таъкидлаган.
Июль ойида бошланган кучли жазирама Эрон энергетика тизимига жиддий босим ўтказмоқда. Жанубий ҳудудларда ҳарорат +50 даражадан ошгани туфайли электр мамлакат бўйлаб навбатма-навбат ва жадвал асосида маълум вақтга узиб қўйилмоқда.
Бундан ташқари, сув омборларидаги сув сатҳи пасайиб бораётгани сабабли Теҳронда ичимлик суви босими ҳам камайтирилган. Маҳаллий ОАВ буни “сўнгги юз йилликдаги энг даҳшатли қурғоқчилик” сифатида баҳолаган.
Изоҳ (0)