Россия армияси 12 февраль куни Украина пойтахти Киевга баллистик ракеталар учирди. Ҳужум оқибатида қурбон ва ярадорлар бор. Бу ҳақда шаҳар мэри Виталий Кличко хабар берди.
Украина пойтахтининг бир неча туманларида вайронагарчиликлар қайд этилган. Оболон туманидаги офис биносида ёнғин бошланган. Бир киши ҳалок бўлган, маълумотни шаҳар мэри тасдиқлаган. Унинг сўзларига кўра, икки киши касалхонага ётқизилган. Жабрланганлар орасида бир бола ҳам бор.
Жароҳатланганларнинг умумий сони, сўнгги маълумотларга кўра, тўрт кишини ташкил этмоқда. Ракета ҳужумидан кейин Украина пойтахтининг яна бир неча туманида ёнғинлар қайд этилган.
Дарницкий туманидаги хусусий корхоналардан бирида, Голосеев туманидаги икки қаватли омборхонада ёнғин бошланган. Воқеа жойида қутқарувчилар ишламоқда. Киевнинг Соломенский ва Святошинский туманларида ёнғинлар турар-жой биноларининг томларида кузатилган.
Оқибатларни бартараф этиш учун ўнлаб фавқулодда хизматлар ходимлари ва техника жалб қилинган, деди Виталий Кличко.
Украина ҳарбий-ҳаво кучлари Киевга, шунингдек, Кривой Рогга зарбалар Россиянинг “Искандер” баллистик ракеталари томонидан берилганини аниқлади. Олтитаси Брянск вилоятидан, яна биттаси аннексия қилинган Қримдан учирилган. Шунингдек, Украина ҳудудига ҳужумда юздан ортиқ дрон иштирок этган.
Изоҳ (0)