Украина Вашингтон аллақачон Киевга кўрсатган ҳарбий ёрдам учун тўлов сифатида АҚШга 500 миллиард долларлик нодир металларни топширишга рози бўлди. Бу ҳақда АҚШ президенти Дональд Трамп Fox News телеканали эфирида маълум қилди.
Шу билан бирга, Трампнинг айтишича, АҚШ Россия билан тинчлик келишувига эришиш-эришмаслигидан ва уруш натижаси қандай бўлишидан қатъи назар, Украинанинг табиий ресурсларидан фойдаланиш имкониятига эга бўлиши керак.
Украинлар Россия билан урушни тўхтатиш ҳақида битим тузишлари мумкин. Улар келиша олмасликлари ва битим тузмасликлари ҳам мумкин. Бир кун келиб улар россиялик бўлиши ҳам, бўлмаслиги ҳам эҳтимолдан холи эмас. Лекин сарфлаган пулларимизнинг ҳаммасини қайтариб олмоқчи эканимни айтдим. Мен уларга ноёб ер минераллари кўринишидаги 500 миллиард доллар эквивалентини хоҳлаётганимни маълум қилдим. Ва улар, аслини олганда, бунга аллақачон рози бўлишган, деди Трамп.
Трамп аввалроқ Украинанинг нодир ер элементларини Америка ёрдами эвазига олишга қизиқиш билдирган эди.
Биз Украина билан шундай битим тузмоқчимизки, унга кўра, улар биздан олаётган нарсалар эвазига бизга нодир ер элементлари ва бошқа маҳсулотларни беришади, деди Трамп.
У нодир ер элементлари етказиб берилишининг хавфсизлигини таъминлашни истаётганини ва Украина бу борада ёрдам беришга тайёр эканлигини қўшимча қилди.
Биз юзлаб миллиард доллар сармоя киритмоқдамиз. Уларда ажойиб нодир ер элементлари мавжуд, деб таъкидлади АҚШ президенти.
Украинанинг АҚШ билан ноёб минералларни биргаликда қазиб олиш бўйича таклифи мамлакат президенти Владимир Зеленский 2024 йил октябрда — Америкадаги президентлик сайловидан олдин, Трамп ва республикачи конгрессменларга тақдим этган “ғалаба режаси”нинг бандларидан бири ҳисобланади. Бу ҳақда Financial Times (ФТ) нашри ёзган, кейинроқ эса Украина президенти офиси маслаҳатчиси Михаил Подоляк ушбу маълумотни тасдиқлаган ва гап, хусусан, литий ва титан конлари ҳақида кетаётганига аниқлик киритган.
ФТ маълумотларига кўра, ушбу банд ҳамда Европадаги Америка ҳарбий контингентини қисман Украина қўшинлари билан алмаштириш таклифи республикачи номзодни қизиқтирган.
Изоҳ (0)