Rossiya armiyasi 12-fevral kuni Ukraina poytaxti Kiyevga ballistik raketalar uchirdi. Hujum oqibatida qurbon va yaradorlar bor. Bu haqda shahar meri Vitaliy Klichko xabar berdi.
Ukraina poytaxtining bir necha tumanlarida vayronagarchiliklar qayd etilgan. Obolon tumanidagi ofis binosida yong‘in boshlangan. Bir kishi halok bo‘lgan, ma’lumotni shahar meri tasdiqlagan. Uning so‘zlariga ko‘ra, ikki kishi kasalxonaga yotqizilgan. Jabrlanganlar orasida bir bola ham bor.
Jarohatlanganlarning umumiy soni, so‘nggi ma’lumotlarga ko‘ra, to‘rt kishini tashkil etmoqda. Raketa hujumidan keyin Ukraina poytaxtining yana bir necha tumanida yong‘inlar qayd etilgan.
Darnitskiy tumanidagi xususiy korxonalardan birida, Goloseyev tumanidagi ikki qavatli omborxonada yong‘in boshlangan. Voqea joyida qutqaruvchilar ishlamoqda. Kiyevning Solomenskiy va Svyatoshinskiy tumanlarida yong‘inlar turar-joy binolarining tomlarida kuzatilgan.
Oqibatlarni bartaraf etish uchun o‘nlab favqulodda xizmatlar xodimlari va texnika jalb qilingan, dedi Vitaliy Klichko.
Ukraina harbiy-havo kuchlari Kiyevga, shuningdek, Krivoy Rogga zarbalar Rossiyaning “Iskander” ballistik raketalari tomonidan berilganini aniqladi. Oltitasi Bryansk viloyatidan, yana bittasi anneksiya qilingan Qrimdan uchirilgan. Shuningdek, Ukraina hududiga hujumda yuzdan ortiq dron ishtirok etgan.
Izoh (0)